Լուսանկարչական աշխատանքների ցուցահանդեսը բացեց Խաչատրյանական փառատոնը

ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: Արամ Խաչատրյան 4-րդ միջազգային փառատոնի շրջանակում՝ «Արամ Խաչատրյան» համերգասրահի նախասրահում տեղի ունեցավ «Ազատություն» խորագրով լուսանկարչական աշխատանքների մրցույթ-փառատոնը: «Նկարներում «Արվեստը մեր շուրջ», «Ազատություն» թեմաներն են արծարծվում: Աշխատանքներն ընտրվել են միջազգային ժյուրիի կողմից»,-«Արմենպրես»-ի հաղորդմամբ` նշեց «Fiap» միջազգային ֆոտոմիության ներկայացուցիչ, լուսանկարիչ Վիգեն Մնոյանը:

Մրցույթ փառատոնին ներկայացվել են 160 երկրից 300 լուսանկարիչների աշխատանքներ:

Լուսանկարներից շատերը ստիպում էին մարդկանց երկար կանգնել և ուսումնասիրել դրանք:

Հաղթողների անունները պարզ կդառնան հոկտեմբերի 8-ին: Նրանց մեդալներ կշնորհվեն:

Ցուցահանդեսը նվիրված էր ՀՀ անկախության 25-ամյակին և իրականացվում էր «Fiap» միջազգային ֆոտոմիության կողմից: