2 րոպեի ընթերցում
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Գերմանիայի առաջնության 4-րդ տուրում տեղի կունենա Բունդեսլիգայի ամենահետաքրքիր դիմակայություններից մեկը: «Արմենպրես»-ի հաղորդմամբ, «Վոլսբուրգ»-ը սեփական հարկի տակ ուժերն է չափելու Դորտմունդի «Բորուսիա»-ի հետ: Խաղային օրվա կենտրոնական մրցավեճում ուժերը կչափեն առաջնությունում Մյունխենի «Բավարիա»-ի հետ չեմպիոնական տիտղոսի համար պայքարող 2 գլխավոր ակումբները:
«Վոլսբուրգ»-ն առաջնության մեկնարկից առաջ կորցրել է առաջատարներից Անդրե Շյուռլեին և ինչպես ցույց է տալիս մրցաշրջանի սկիզբը՝ ակումբը խնդիրներ ունի առջևի գծում: «Բորուսիա»-ն, իր հերթին, բավականին լավ ֆուտբոլ է խաղում, թեև 2-րդ ուրում անակնկալ պարտություն է կրել «Լեյպցիգ»-ից: Մրցաշարային աղյուսակում «Բորուսիա»-ն 5-րդ տեղում է, իսկ ահա «Վոլսբուրգ»-ն ընթանում է 8-րդ հորիզոնականում: Թիմերին բաժանում է ընդամենը 1 միավոր:
Թիմերն իրենց պատմության ընթացքում հանդիպել են 38 անգամ: Հաղթանակների քանակով առավելությունը ռուրյան ակումբի կողմն է: «Բորուսիա»-ն հաղթել է 20 խաղում, «Վոլսբուրգ»-ն իր օգտին ունի 9 խաղ, ևս 9 հանդիպում ավարտվել է ոչ-ոքի: Թիմերի վերջին 2 դիմակայություններում հաղթել է «Բորուսիա»-ն: Մրցավեճում բուքմեյքերական ընկերություները ֆավորիտ են համարում դորտմունդյան ակումբին: Խաղը մեկնարկելու է Երևանի ժամանակով` 22:00-ին:
Գերմանիայի առաջնության 4-րդ տուրում այսօր տեղի կունենա ևս 3 հանդիպում.
«Դարմշտադ»-«Հոֆենհայմ»
«Ֆրայբուրգ»-«Համբուրգ»
«Ինգոլշտադ»-«Այնթրախտ»: