Հասարակությունը չի կիսում այս ձևով հարցեր լուծելու մոտեցումը. Կիրո Մանոյանը` զինված խմբի մասին
2 րոպեի ընթերցում
ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Զինված խմբի կողմից կատարված գործողությունները վատ ազդեցություն կունենան Հայաստանի արտաքին հարաբերությունների վրա: Լրագրողների հետ հանդիպմանը նման տեսակետ հայտնեց ՀՅԴ Բյուրոյի Հայ Դատի և քաղաքական հարցերի գրասենյակի ղեկավար Կիրո Մանոյանը: Նրա խոսքով` այդ ազդեցության չափը կախված կլինի նաև առաջացած իրավիճակի հանգուցալուծումից: «Արդեն հայտարարել ենք` երկրում փոփոխությունների այսպիսի միջոցները կուսակցության համար ընդունելի չեն: Արտաքին քաղաքականության տեսնակյունից սա երկրի համար միայն վատ ազդեցություն ունի և կշարունակի ունենալ, տակավին, չգիտենք ինչպես կավարտվի: Եթե ավելի ծանր զոհերի թվով ավարտվի, դա ավելի վատ կլինի երկրի արտաքին հարաբերությունների համար»,-«Արմենպրես»-ի փոխանցմամբ` ասաց քաղաքական գործիչը:
Նրա դիտարկմամբ` հասարակության շրջանում կա դժգոհություն, բայց դա չի արդարացնում բռնի քայլերի դիմելը: «Հասարակության արձագանքից երևում է, որ հասարակությունը չի կիսում այս ձևով հարցեր լուծելու մոտեցումը: Մյուս կողմից` հասարակությունը անհրաժեշտ է, ընդհանուր առմամբ, կազմակերպված լինի, որ ազդի երկրում փոփոխություններ իրականացնելու վրա, որ մարդիկ այսպիսի ծայրահեղական միջոցների դիմելու մասին չմտածեն»,-հավելեց Կիրո Մանոյանը:
Ինչ վերաբերում է Հայաստանի Հանրապետական կուսակցության հետ ստեղծված իրավիճակի վերաբերյալ քննարկում ունենալու հարցին, ապա նա առաջարկեց դա ճշտել ՀՅԴ գերագույն մարմնից:
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:
ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: