2 րոպեի ընթերցում
ԹԲԻԼԻՍԻ, 23 ԴԵԿՏԵՄԲԵՐԻ, ԱՐՄԵՆՊՐԵՍ: Վրաստանի վարչապետ Իրակլի Ղարիբաշվիլին տեղի ունեցած բրիֆինգի ժամանակ հայտարարել է զբաղեցրած պաշտոնից հեռանալու որոշման մասին:
«Ես այսօր հեռանում եմ իմ պաշտոնից, սակայն մնում եմ իմ երկրի հավատարիմ զինվորը»,- ասել է Ղարիբաշվիլին:
«Արմենպրես»-ի փոխանցմամբ` համաձայն Վրաստանի Սահմանադրության, վարչապետի հրաժարականի դեպքում, կառավարության լիազորությունները կասեցվում են և գործադիրի անդամները սկսում են ժամանակավորապես կատարել իրենց պարտականությունները:
Վրաստանի նախագահը 7 օրվա ընթացքում խորհրդարանի հաստատմանը պետք է ներկայացնի խորհրդարանական մեծամասնության ներկայացրած վարչապետի նոր թեկնածուին:
Իր հերթին, վարչապետի թեկնածուն պետք է խորհրդարանին ներկայացնի կառավարության անդամ թեկնածուներին` կառավարության նկատմամբ վստահություն ձեռք բերելու համար: Խորհրդարանը ևս 7 օրվա ընթացքում պետք է դիտարկի կառավարությանը վստահություն հայտնելու հարցը և այն ընդունի գրավոր մեծամասնությամբ:
Այդ գործընթացից հետո երկու օրվա ընթացքում նախագահը պետք է հաստատի նոր կառավարությունը` նոր վարչապետով:
Վրացական ԶԼՄ-ների տեղեկատվության համաձայն՝ Ղարիբաշվիլին պաշտոնաթող Է լինում, որպեսզի գլխավորի «Վրացական երազանք-ժողովրդավարական Վրաստան» կուսակցության նախընտրական շտաբը եւ «Վրացական երազանք» կոալիցիայի ընտրացուցակը: