1 րոպեի ընթերցում
ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Ստամբուլում Հունաստանի հավաքականի հետ հանդիպման ընթացքում Փարիզում ահաբեկչության զոհերի հիշատակին հայտարարված հարգանքի րոպեի ժամանակ ամբողջ մարզադաշտի կողմից սուլոցներով արձագանքելուց հետո նույնը տեղի է ունեցել նաեւ Բաքվում Ադրբեջանի եւ Մոլդովայի պատանեական հավաքականների հանդիպման ժամանակ:
Ինչպես հաղորդում է «Արմենպրես»-ը` վկայակոչելով ադրբեջանական ԶԼՄ-ները, խաղն սկսվելուց առաջ փարիզյան ահաբեկչական գործողությունների զոհերի հիշատակին լռության րոպե է հայտարարվել, սակայն, երկրպագուները սկսել են սուլել եւ գոռալ:
Ստամբուլում կատարվածը միջազգային մամուլը գնահատել է որպես Թուրքիայի խայտառակություն: Լռության րոպե հայտարարվելուց հետո մարզադաշտում երկրպագուների սուլոցներն ու վայրենի գոռոցներն ուղեկցվել են «Ալլահու աքբար», «Ալլահը մեծ է», «Շեհիդներն անմահ են, հայրենքն անբաժանելի է» պաստառներով եւ բացականչություններով:
Ստամբուլում անցկացված Թուրքիա-Հունաստան ընկերական հանդիպումը մարզադաշտում դիտել են երկու երկրների վարչապետներ Ահմեդ Դավութօղլուն եւ Ալեքսիս Ցիպրասը: