2 րոպեի ընթերցում
ԵՐԵՎԱՆ, 17 ՆՈՅԵՄԲԵՐԻ, ԱՐՄԵՆՊՐԵՍ: Պոլսահայ մտավորական Հրանտ Դինքին սպանած Օգյուն Սամասթը նամակով դիմել է Ստամբուլի ծանր հանցագործությունները քննող 5-րդ դատարան՝ ցանկություն հայտնելով մասնակցել Դինքի սպանության գործով դատական նիստերին:
Ինչպես հաղորդում է «Արմենպրես»-ը՝ վկասյակոչելով «Ակոս» պարբերականը, նամակում Սամասթը հայտնել է, որ դատական նիստերին մասնակցելու համար նա ցանկանում է տեղափոխվել Ստամբուլում գտնվող բանտ:
Ներկայում Սամասթն իր պատիժը կրում է Քոջաէլիի F տիպի բանտում:
2012 թվականի հունվարի 17-ին դատարանի որոշմամբ Դինքի սպանության կազմակերպիչ Յասին Հայալը ցմահ բանտարկության է դատապարտվել, անմիջական հանցագործ Օգյուն Սամասթը` 22 տարվա ազատազրկման:
2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում է կայացրել Հրանտ Դինքի սպանության գործով դատավարությունն սկսել զրոյից: Այս անգամ բոլոր ամբաստանյալներին կառաջադրվի «հանցավոր խմբավորման ստեղծման եւ կառավարման կամ դրանում մասնակցություն ունենալու» մեղադրանք: Բացի այդ, Դինքի սպանության ժամանակ բարձր պաշտոններ զբաղեցրած 9 անձանց, այդ թվում` Ստամբուլի նախկին ոստիկանապետ Ջելալեթին Ջերահի նկատմամբ դատական գործեր հարուցելու կապակցությամբ որոշումներ են ընդունվել: