4 րոպեի ընթերցում
ԵՐԵՎԱՆ, 15 ՀՈԿՏԵՄԲԵՐԻ, ԱՐՄԵՆՊՐԵՍ: Եվրամիությունը աջակցում է Հայաստանին օտարերկրյա ներդրումները խթանելու և ներդրումային քաղաքականությունը բարելավելու հարցում: Հայաստանում պաշտոնապես մեկնարկել է «Հայաստանի ներդրումների խթանման և ներդրումային քաղաքականության ինստիտուցիոնալ համակարգի հզորացում» Թվինինգ ծրագիրը, որն ստորագրել են ՀՀ էկոնոմիկայի նախարարությունը, Հայասատնում ԵՄ պատվիրակությունը և ֆրանսիական «Բիզնես Ֆրանս» ընկերությունը, որ շահել է ծրագիրն իրականացնելու իրավունքը:
ՀՀ էկոնոմիկայի նախարարի առաջին տեղակալ Գարեգին Մելքոնյանը նշեց, որ ծրագրի հիմնական նպատակն է ավելացնել Հայաստանում օտարերկրյա ուղղակի ներդրումների ծավալը, աջակցել ՀՀ էկոնոմիկայի նախարարությանը և Հայաստանի զարգացման հիմնադրամին` դառնալու ներդրումային քաղաքականության մշակող և ներդրումներ խթանող առավել արդյունավետ մարմիններ:
Ծրագիրն ունենալու է երեք բաղադրիչ: «Առաջին բաղադրիչը հետներդրումային ծառայությունների զարգացումն է, որը կավելացնի օտարերկրյա ներդրողներին աջակցության, Հայաստանում նրանց ընդլայնվելու և օտարերկրյա կապիտալը Հայաստանի տնտեսությունում ինտեգրելու Հայաստանի զարգացման հիմնադրամի կարողությունները»,- «Արմենպրես»-ի հաղորդմամբ՝ ընդգծեց փոխնախարարը:
Երկրորդ բաղադրիչը օտարերկրյա ուղղակի ներդրումների ռազմավարության զարգացումն ու ներդրումային միջավայրի բարելավումն է: Բաղադրիչի նպատակն է աջակցել ՀՀ էկոնոմիկայի նախարարության ներդրումային քաղաքականության վարչությանը՝ օտարերկրյա ուղղակի ներդրումների ռազմավարության մշակման հարցում, ուրվագծել ներդրումների տեսլականը, նպատակները և թիրախները, ինչպես նաև նկարագրել ուղղակի ներդրումներից ակնկալվող ազդեցությունը և առավելությունները:
Ծրագրի երրորդ բաղադրիչը ներդրումների խթանումն է և ներդրումային քաղաքականության իրականացման աջակցությունն ու առաջմղեւմը: «Այս բաղադրիչի նպատակն է կիրառել ներդրումների ներգրավման քարոզարշավի իրականացման լավագույն փորձը և աջակցել ներդրումների խթանման գործիքների զարգացմանը՝ բարձրացնելով ներդրումների համար պատասխանատու Հայաստանի զարգացման հիմնադրամի վստահելիությունը»,- եզրափակեց Գարեգին Մելքոնյանը:
ՀՀ-ում Ֆրանսիայի արտակարգ և լիազոր դեսպան Ժան-Ֆրանսուա Շարպանտիենընդգծեց, որ ծրագրի նպատակն է հասնել այն բանին, որ ամիսներ հետո Հայաստանը բոլորովին այլ կերպ ներկայանա օտարերկրյա ներդրողներին: «Օտարերկյա ներդրումների ներգրավման համար առաջին հերթին անհրաժեշտ է ստեղծել բարենպաստ բիզնես միջավայր, թափանցիկություն և ազատ մրցակցություն: Սրանք են այն գլխավոր պայմանները, որոնք բերում են օտարերկրյա ներդրումների հոսք: Այս առումով սա շատ հավակնոտ ծրագիր է: Ես ցանկանում եմ իմ գոհունակությունը հայտնել, որ այս ծրագիրն իրականացնելու է ֆրանսիական ընկերություն: Շատ եմ կարևորում նաև այն հանգամանքը, որ այս ծրագիրն իրականացվում է Հայաստան-Եվրամիություն տնտեսական հարաբերությունների ներկա ակտիվության փուլում»,- շեշտեց դեսպանը՝ հաջողություն մաղթելով ծրագիրն իրականացնող մարմիններին: