Ադրբեջանցի ռեկտորը ձերբակալվել է Գերմանիայում

ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Ինտերպոլի աշխատակիցների կողմից Գերմանիայում ձերբակալվել է Ադրբեջանի «Թեֆեքյուր» համալսարանի Կիեւի մասնաճյուղի նախկին ռեկտոր, գերմանական Թրիր քաղաքում գործող azereurotimes.wordpress.com կայքի ադրբեջանցի հիմնադիր Ռիյադ Ալիեւը:

Ինչպես հաղորդում է «Արմենպրես»-ը` վկայակոչելով criminal.az կայքը, Ռիյադ Ալիեւը տարվել է Նյուրնբերգի հետաքննչական մեկուսարան:

Ռիյադ Ալիեւը 2015 թվականի մայիսի 5-ից գտնվում է Ինտերպոլի գծով որոնման մեջ:

Համալսարանի ղեկավարության դիմումի համաձայն Բաքվի Յասամալի շրջանային դատարանը 2014 թվականի նոյեմբերի 24-ին Ռիյադ Ալիեւի նկատմամբ դատական գործ էր հարուցել համալսարանի ղեկավարների, որոշ պաշտոնատար անձանց հասցեին զրպարտություններ անելու համար: Ռիյադ Ալիեւը խուսափել է դատարանի կանչերից եւ փախել արտասահման: