Ադրբեջանի ԱԳՆ-ն փորձում է կորցնել արտասահմանում ապաստան խնդրող նախկին դիվանագետների հետքերը
3 րոպեի ընթերցում
![Ադրբեջանի ԱԳՆ-ն փորձում է կորցնել արտասահմանում ապաստան խնդրող նախկին դիվանագետների հետքերը](http://armenpress.am/resized/480/static/news/b/2015/09/818569.jpg)
ԵՐԵՎԱՆ, 14 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի ԱԳՆ-ն իր կայքից հանել է արտասահմանյան դեսպանատներում հավատարմագրված բոլոր աշխատակիցների անունները` արտասահմանում ապաստան խնդրող ադրբեջանցի նախկին դիվանագետների հետքերը կորցնելու համար:
Այս մասին, ինչպես հաղորդում է «Արմենպրես»-ը, հայտնում է haqqin.az լրատվական կայքը:
Անցյալ շաբաթ Ադրբեջանի ԱԳՆ-ի թվով արդեն չորորդ աշխատակիցը` Հոլանդիայում ռազմական կցորդ Նահիդ Մուխտար օղլու Ջաֆարովը հրաժարվել է վերադառնալ հայրենիք եւ ապաստան է խնդրել այդ երկրում:
Սակայն, Ադրբեջանի ԱԳՆ-ն շտապել է հայտարարել, թե նման անունով մարդ նախարարության համակարգում չի աշխատում: Բայց, կայքի թղթակցին առանց դժվարության հաջողվել էր Ադրբեջանի ԱԳՆ-ի կայքում արտասահմանում հավատարմագրված դիվանագիտական առաքելությունների բաժնում գտնել Նահիդ Ջաֆարովի անունը:
Սեպտեմբերի 14-ին Ադրբեջանի ԱԳՆ-ն շտապ կարգով թարմացրել է կայքի այդ բաժինը, որից անհետացել են արտասահմանում հավատարմագրված ադրբեջանական բոլոր դիվանագետների անունները:
Ավելի վաղ արեւմտյան երկրներում ապաստան են խնդրել Իսլամական համագործակցության կազմակերպությունում եւ Եվրամիությունում Ադրբեջանի նախկին դեսպան Արիֆ Մամեդովը, Ավստրալիայում Ադրբեջանի դիվանագիտական առաքելության երրորդ քարտուղար Անար Հուսեյնովը եւ աշխատակից Ֆարիդ Սուբհանվերդիեւը: Նրանք բոլորը Ադրբեջանի ԱԳՆ-ից հեռացվել են այն պատճառով, որ քննադատել են իշխանություններին` Ադրբեջանում մարդու իրավունքները կոպտորեն խախտելու համար: Բոլոր դիվանագետները հայտարարել են, որ արտասահմանում ապաստանի դիմում են ներկայացրել Ադրբեջանում իրենց նկատմամբ հետապնդումներ սկսվելու պատճառով:
Haqqin.az լրատվական կայքին հայտնի է դարձել, որ եւս մեկ ադրբեջանցի դիվանագետ, որի անունը չի հիշտակվում, ապաստան է խնդրել Կանադայում:
Ադրբեջանի փոխվարչապետ, փախստականների եւ հարկադիր վերաբնակների հարցերով պետկոմիտեի նախագահ Ալի Հասանովը Եվրախորհրդարանում ընդունված` այդ երկրում մարդու իրավունքների խախտումների հետ կապված պատժամիջոցների կոչ պարունակող բանաձեւի առնչությամբ հայտարարել է, որ «Ադրբեջանի որոշ դեսպաններ զբաղված են բիզնեսով, իսկ մյուսներն էլ դավաճանում են»: