Վիրահայերն ահազանգել են Խուլո քաղաքում ընդունված հայերի համար վիրավորական փաստաթղթի առնչությամբ
2 րոպեի ընթերցում
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Վրաստանի հայ համայնքի իրավապաշտպան 9 հասարակական կազմակերպություններ դիմել են երկրի կառավարությանը` հորդորելով արձագանքել Աջարիայի Ինքնավար Հանրապետությունում իսլամացած վրացիներով և թուրքերով բնակեցված Խուլո քաղաքի քաղաքային խորհրդի պաշտոնական կայքում տեղադրված փաստաթղթին: Ինչպես «Արմենպրես»-ին տեղեկացրին Վրաստանի հայ համայնքից, «Խուլո մունիցիպալիտետում կատարված աշխատանքի մասին հաշվետվություն» խորագրով փաստաթղթի ուսումնասիրությունը պարզել է, որ այնտեղ իրականում առկա են էթնիկ տարաձայնությունների հրահրում և հայատյացության նշաններ:
Մասնավորապես, տվյալ փաստաթղթում խոսվում է Վրաստանի նախկին նախագահ Միխայիլ Սաակաշվիլու մասին, ում ակնհայտ բացասական համատեքստում համարում են հայ: «Այդ հայ Սահակն այնքան ուղեղ ունի, որ հեռվից նայի Զուրաբ Ժվանիայի սպանության գործին…», -ասված է փաստաթղթում:
Փաստաթուղթն ընդունվել է Խուլո քաղաքապետարանի «Վրացական երազանք» խմբակցության անունից:
«Վրաստանի հայ համայնքը կոչ է անում իշխող կոալիցիայի ղեկավարությանը հետաքննել տվյալ փաստը և տեղեկացնել երկրի հասարակությանն այն պատժամիջոցների մասին, որոնք կկիրառվեն կուսակցության տարածաշրջանային կառույցի ներկայացուցչության նկատմամբ նման անընդունելի և երկրի համար վտանգավոր դիրքորոշման համար»,- ասված է համայնքի հայտարարության մեջ: