Ադրբեջանի բնակիչները շարունակում են պիկետը նախագահական նստավայրի դիմաց
2 րոպեի ընթերցում
![Ադրբեջանի բնակիչները շարունակում են պիկետը նախագահական նստավայրի դիմաց](http://armenpress.am/resized/480/static/news/b/2015/08/816567.jpg)
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Բաքվի Զըխ ավանի 50-ից ավելի բնակիչներ բողոքի նստացույց են սկսել Ադրբեջանի նախագահի աշխատակազմի շենքի առաջ: Նրանք հանդիպում են պահանջում պաշտոնատար անձանց հետ` սողանքային գոտում գտնվող իրենց տների հարցը կարգավորելու համար:
Ինչպես հաղորդում է «Արմենպրես»-ը` վկայակոչելով ադրբեջանական ԶԼՄ-ները, պիկետի մասնակիցները չեն ենթարկվում ցրվելու մասին ոստիկանության պահանջին:
«Մենք հանդիպում ենք պահանջում փոխվարչապետ Աբիդ Շարիֆովի հետ: Մենք կշարունակենք ակցիան այնքան ժամանակ, մինչեւ նա ընդունի մեզ: Մեր տները գտնվում են վտանգավոր գոտում եւ ցանկացած պահի կարող են քանդվել: Ընտանիքների մեծ մասը դուրս է եկել վթարային բանակարններից: Ժամանակին Սուրախանի գործադիր իշխանության ղեկավարը խոստացել էր վերաբնակներին վճարել վարձակալած բնակարանների համար, սակայն, անցել է 5 տարի, նա չի կատարում խոստումը», - բողոքում են ակցիայի մասնակիցները:
Ակցիայի մի մասնակից ասել է. «Անձրեւից հետո մեր տների ճաքերն ավելի են խորանում: 500 ընտանիքներ կանգնած են փլատակների տակ մնալու վտանգի առաջ: Իշխանությունները չեն կատարում տներն ամբողջությամբ ոչ պիտանի դարձած 55 ընտանիքներին 3 օրվա ընթացքում կացարանով ապահովելու խոստումը: Բնակիչները հայտնվել են անելանելի վիճակում»:
ԶԼՄ-ները հայտնել են, որ ոստիկանությունը լրագրողներին թույլ չի տվել նկարահանել բողոքի ակցիան: