Ադրբեջանցի լրագրողները բողոքի ակցիա են կազմակերպել գլխավոր դատախազության շենքի դիմաց
1 րոպեի ընթերցում
![Ադրբեջանցի լրագրողները բողոքի ակցիա են կազմակերպել գլխավոր դատախազության շենքի դիմաց](http://armenpress.am/resized/480/static/news/b/2015/08/816564.jpg)
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Մի խումբ ադրբեջանցի լրագրողներ բողոքի ակցիա են կազմակերպել Ադրբեջանի գլխավոր դատախազության շենքի դիմաց` դժգոհություն արտահայտելով իրենց գործընկեր Ռասիմ Ալիեւի սպանության վերաբերյալ գործով հետաքննության ընթացքից:
Այս մասին, ինչպես հաղորդում է «Արմենպրես»-ը, հայտնում են ադրբեջանական ԶԼՄ-ները:
Դժգոհ լրագրողներին ընդունել է Բաքվի դատախազ Ազիզ Սեիդովը: Լրագրողները նաեւ պահանջել են պատասխանատվության կանչել Ռասիմ Ալիեւի բուժման ժամանակ անփութություն թույլ տված բժիշկներին:
Օգոստոսի 8-ին մոտ ժամը 18-ին Բաքվի Բաիլովի շրջանում «Բաքու մարկետ» խանութի դիմաց անհայտ անձինք դաժանորեն ծեծի են ենթարկել լրագրող Ռասիմ Ալիեւին այն բանի համար, որ նա ֆեյսբուքյան իր էջում քննադատել է «Գաբալա»-ի հանդիպումներից մեկում մրցակից թիմի խաղացողների նկատմամբ Ջավիդ Հուսեյնովի ագրեսիվ եւ ոչ վայել պահվածքը: Ծեծի ենթարկողները, որոնք եղել են Ջավիդ Հուսեյնովի մերձավորներն ու հարազատները լրագրողին բազմաթիվ մարմնական ծանր վնասվածքներ են պատճառել: Լրագրողը տարվել է Բաքվի կլինիկական բժշկական կենտրոն, սակայն, օգոստոսի 9-ին ժամը 5-ին Ռասիմ Ալիեւը ստացած վնասվածքներից գիտակցության չգալով մահացել է: