Ադրբեջանում զանգվածաբար փակվում են թանկարժեք հագուստի խանութները
2 րոպեի ընթերցում
![Ադրբեջանում զանգվածաբար փակվում են թանկարժեք հագուստի խանութները](http://armenpress.am/resized/480/static/news/b/2015/08/816537.jpg)
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Փետրվարյան 34 տոկոսով արժեզրկումից հետո ադրբեջանական մանաթի երկրորդ անգամ մոտ 25 տոկոսով էժանանալու հավանականությունից խուճապի մատնված Բաքվում զանգվածաբար սկսել են փակվել թանկարժեք հագուստի խանութները:
Ինչպես հաղորդում է «Արմենպրես»-ը` վկայակոչելով ադրբեջանական ԶԼՄ-ները, Բաքվի կենտրոնում փակվող խանութները երեկվանից ապրանքների լիկվիդացիոն վաճառք են հայտարարել: Խանութների տերերը ցանկանում են պահ առաջ ազտավել թանկարժեք ապրանքներից` երկյուղելով, որ մանաթի արժեզրկումը կարող է բերել բնակչության գնողունակության նվազման:
Փորձագետների կանխատեսումներով` Ադրբեջանի ազգային արժույթի` մանաթի նկատմամբ դոլարի ճնշումն ամեն օր ավելանում է, եւ մանաթը չի կարողանալու դիմանալ դրան: Մանաթի ներկայիս փոխարժեքի պահպանման համար Ադրբեջանի կենտրոնական բանկի արտարժույթի պահուստը հասել է վերջանալու մակարդակի: Իսկ դա խոսում է այն մասին, որ փետրվարյան 34 տոկոս արժեզրկումից հետո մանաթի երկրորդ արժեզրկումն անխուսափելի է:
«Ազատություն» ռադիոկայանի ադրբեջանական ծառայության հետ զրույցում ադրբեջանցի տնտեսագետ-փորձագետ Սամիր Ալիեւը անխուսափելի է համարել մանաթի երկրորդ արժեզրկումն այս տարի:
«Այս անգամ արժեզրկումը կլինի 20-25 տոկոսի սահմաններում: Հնարավոր է` կառավարությունը գնա փափուկ արժեզրկման: Սակայն, եթե իրավիճակն անելանի դառնա, կտրական արժեզրկումն անխուսափելի կլինի», -ասել է նա:
Ադրբեջանի կենտրոնական բանկի տվյալներով` միայն հուլիսին բանկի արտարժույթի պահուստը 18,7 մլն դոլարով նվազել է: Փետրվարի 21-ի` մանաթի արժեզրկումից հետո ԿԲ-ի արտարժույթի պահուստը 3 մլրդ դոլարով նվազել է, իսկ տարեկան կտրվածքով` 6,6 մլրդ դոլարով: