Ադրբեջանում աճում է տալասեմիայով հիվանդ անչափահասների թիվը

ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Ադրբեջանում տալասեմիայով հիվանդ անչափահասների թիվը սպառնալից չափով աճում է:

Այս մասին, ինչպես հաղորդում է «Արմենպրես»-ը, հայտնում է «Էխո» թերթը` հղում կատարելով Ադրբեջանի պետական վիճակագրական կոմիտեի «Առողջությունը, սոցիալական ապահովումը եւ բնակարանային պայմաններն Ադրբեջանում» զեկույցի տվյալներին:

Այդ վիճակագրության համաձայն` եթե 2005 թվականին Ադրբեջանում 302, 2010 թվականին` 359, 2012 թվականին` 482, 2013 թվականին` 371 տալասեմիա ախտորոշված հիվանդներ են գրանցվել, ապա 2014 թվականին նման հիվանդների թիվը գերազանցել է 530-ը, որոնցից 347-ը մինչեւ 17 տարեկան անչափահասներ են եղել:

Արյան այդ հիվանդությունն ազգակցական ամուսնությունների բացասական հետեւանքներից մեկն է, որը խիստ տարածված է Ադրբեջանում:

Ադրբեջանցի պրոֆեսոր Էլխան Ռասուլովի հետազոտությունների համաձայն` Ադրբեջանում ազգակցական ամուսնություններն ընդհանուր թվում կազմում են 18-19 տոկոս, ինչի արդյունքում նման ընտանիքներում ծնված երեխաների մեծ մասը տառապում են տարբեր անբուժելի հիվանդություններով:

Պաշտոնական վիճակագրական տվյալներով` Ադրբեջանի բնակչության 8 տոկոսը տալասեմիայի կրող է: Ադրբեջանի արյունաբանության եւ տրանսֆիզիոլոգիայի կլինիկական ինստիտուտի գլխավոր բժիշկ Իսքանդեր Բաղըրովի տվյալներով էլ` Ադրբեջանում մոտ 800 հազար մարդ տալասենմիայի հնարավոր կրող է:

Ադրբեջանի խորհրդարանի սոցիալական ապահովության հանձնաժողովի նախագահ Խադը Ռաջաբլին իր հերթին նշում է, որ Ադրբեջանում ամեն տարի նվազագույնը 200 երեխաներ ծնվում են տալասեմիայով, իսկ 300 երեխաներ` հեմոֆիլիայով:

Տալասեմիայով, հեմաֆիլիայով եւ այլ գենետիկ հիվանդություններով հիվանդների սպառնալից աճը կանգնեցնելու նպատակով Ադրբեջանի Նախագահ Իլհամ Ալիեւը 2014 թվականին հրամանագիր է ստորագրել, որի համաձայն` ամուսնանալ ցանկացողները պարտավոր են բժշկական հետազոտություն անցնել:

ԱՊՀ երկրների «Միր 24» հեռուստաալիքը հայտնել է, որ Ադրբեջանում ինքնասպանության հաճախակի դեպքերն ու գենետիկ հիվանդությունների աճը բերել են առանց բժշկի տեղեկանքի ամուսնությունների արգելքին:

Ադրբեջանական ԶԼՄ-ներն ավելի վաղ հայտնել են, որ Ադրբեջանում հեմոֆիլիայով 1500-ից ավելի հիվանդներ կան, այն տալասեմիա ժառանգական հիվանդության տարածվածության բարձր մակարդակով երկրների թվում է: