Դոնի Ռոստովի ու Թբիլիսիի միջեւ յոթ տարի անց վերսկսվել Է ավիահաղորդակցությունը

ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ: Georgian Airways ավիաընկերությունն օգոստոսի 14-ին յոթ տարվա ընթացքում առաջին չվերթն Է կատարել Դոնի Ռոստովի ու Թբիլիսիի միջեւ՝ վերականգնելով կանոնավոր ավիահաղորդակցությունը: Այդ մասին, ինչպես տեղեկացնում Է «Արմենպրես»-ը, ՌԻԱ Նովոստիին հայտնել Է Ռոստովի օդանավակայանի ներկայացուցիչ Օլգա Լադեյշչիկովան:

ՌԴ-ի եւ Վրաստանի միջեւ կանոնավոր ուղղակի ավիահաղորդակցությունը չեղյալ Էր հայտարարվել 2006 թվականին երկրների միջեւ հարաբերությունների սրվելուց հետո, այնուհետեւ 2008 թվականին ժամանակավորապես վերականգնվել Էր, իսկ հետո կրկին ընդհատվել օգոստոսյան իրադարձություններից եւ դիվանագիտական հարաբերությունների խզվելուց հետո: Ավիահաղորդակցությունը վերականգնելու մասին որոշումն ընդունվել Է 2014 թվականի սեպտեմբերին: Դրանից հետո Վրաստանի եւ Ռուսաստանի միջեւ կանոնավոր չվերթներ են կատարում երեք ռուսական («Սիբիր», «Տրանսաերո» եւ «Աերոֆլոտ») եւ մեկ վրացական (Airzena— Georgian Airways) ավիաընկերությունները:

«Այսօրվանից Դոնի Ռոստովի միջազգային օդանավակայանի չվացուցակում յոթնամյա ընդմիջումից հետո չվերթ Է հայտնվել դեպի Վրաստանի մայրաքաղաք»,-ասել Է գործակալության զրուցակիցը: Նա ճշտել Է, որ Թբիլիսի-Դոնի Ռոստով-Թբիլիսի երթուղով ուղեւորների փոխադրումն իրականացնելու Է Վրաստանի ազգային ավիափոխադրողը՝ Georgian Airways ավիաընկերությունը:

Կանոնավոր չվերթները կատարվելու են 50-տեղանոց Bombardier CRJ-200 ինքնաթիռով: Թռիչքներն իրականացվելու են շաբաթը երկու անգամ՝ երեքշաբթի եւ ուրբաթ օրերին: Չվերթի տեւողությունը 1 ժամ 10 րոպե Է: