Լրագրողական ֆեդերացիաները դատապարտում են Ադրբեջանում լրագրողի սպանությունը

ԵՐԵՎԱՆ, 11 ՕԳՈՍՏՈՍԻ, ԱՐՄԵՆՊՐԵՍ: Լրագրողների եվրոպական ֆեդերացիան եւ Լրագրողների միջազգային ֆեդերացիան հանդես են եկել հայտարարությամբ, որում խորը զայրույթ են արտահայտել Ադրբեջանում լրագրող Ռասիմ Ալիեւի սպանության առնչությամբ:

Ինչպես հաղորդում է «Արմենպրես»-ը, հայտարարության մեջ ասվում է. «Նման ծանր հացագործություններն Ադրբեջանում հնարավոր են անպատժելիության մթնոլորտի պատճառով, երբ առանձին անձինք կարող են լրագրողների եւ իրավապաշտպանների դեմ նման ծանր հանցագործություններ կատարել՝ վստահ լինելով իրենց պաշտպանվածության մեջ: Լրագրողները եւ բոլոր քաղաքացիներն ազատ են իրենց սոցցանցերում եւ առանց որեւէ երկյուղի եւ բռնության սպառնալիքի կարող են ազատ կերպով արտահայտել իրենց մտքերը, կիսվել մեկնաբանություններով»,- հայտարարել է Լրագրողների եվրոպական ֆեդերացիայի նախագահ Մոգենս Բլիչերը:

Ադրբեջանում լրագրող Ռասիմ Ալիեւի սպանության կապակցությամբ հայտարարությամբ հանդես է եկել նաեւ Եվրոպայի Խորհրդի գլխավոր քարտուղար Թուրբյորն Յագլանդը:

«Ես ցնցված եմ Ադրբեջանի լրագրողների ազատության եւ անվտանգության ինստիտուտի տնօրեն Ռասիմ Ալիեւի սպանությամբ: Խիստ մտահոգիչ է այն, որ Ադրբեջանում լրագրողների անվտանգության հետ կապված իրավիճակը շարունակում է վատանալ: Ես Ադրբեջանի իշխանություններին կոչ եմ անում ամբողջությամբ եւ օպերատիվ կերպով հետաքննել այդ սպանությունը եւ պատասխանատվության ենթարկել մեղավորներին: Այդ աղբերգական իրադարձությունը պետք դառնա ադրբեջանական իշխանություններին եւ ամբողջ հասարակությանը վերջին հիշեցումն այն մասին, որ երկրում այդպես շարունակվել այլեւս չի կարող», -հայտարարության մեջ նշել է Յագլանդը:

Լրագրողների ազատության եւ անվտանգության ինստիտուտը ադրբեջանական ոչ կառավարական կազմակերպություն է, որի գործունեությունն ուղղված է լրագրողների ԶԼՄ-ների աշխատակիցների իրավունքների պաշտպանությանը: Ռասիմ Ալիեւի սպանությունը խստորեն դատապարտել է նաեւ ադրբեջանական այդ կազմակերպությունը` գնահատելով այն որպես Ադրբեջանում քաղաքացիական հասարակության եւ այլակարծության վերացմանն ուղղված իշխանությունների նպատակաուղղված բռնաճնշումներով քաղաքականության արդյունք:

Facebook-ում իր հրապարակման համար օգոստոսի 8-ին Բաքվում հարձակման եւ դաժան ծեծի ենթարկված Ռասիմ Ալիեւը մեկ օր հետո մահացել է հիվանդանոցում:

Ադրբեջանում լրագրողների վրա հարձակումների անպատժելիության մթնոլորտը պայմաններ է ստեղծում, եւ հանցագործությունները մնում են չբացահայտված: Դա օժանդակում է նոր հանցագործությունների կատարմանը եւ խթանում է ագրեսիայի շարունակմանը: Իր հերթին, նման իրավիճակը բացասական ազդեցություն է գործում արտահայտվելու ազատության վրա, ասվում է Ադրբեջանի լրագրողների ազատության եւ անվտանգության ինստիտուտի տարածած հայտարարության մեջ:

Վերջին 10 տարիներին Ադրբեջանում լրագրողների դեմ 300-ից ավելի հարձակումներ են կատարվել: Վերջին տարվա ընթացքում 7 լրագրողներ եւ 5 իրավապաշտպաններ ձերբակալվել են, եւ այդ ցուցակը շարունակում է աճել: