1 րոպեի ընթերցում
ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ: ՀՀ կրթության և գիտության նախարար Արմեն Աշոտյանն օգոստոսի 5-ին աշխատանքային հանդիպում է ունեցել ՀՀ մարդու իրավունքների պաշտպանի գրասենյակի ներկայացուցիչների հետ: Ինչպես «Արմենպրես»-ին տեղեկացրին ՀՀ ԿԳ նախարարությունից, հանդիպման ընթացքում քննարկվել են քաղաքացիների կրթության իրավունքի լիարժեք իրացման, ԲՈՀ-ի ընթացակարգերի և գիտական աստիճանաշնորհման կարգի, ինչպես նաև համընդհանուր ներառական կրթության անցնելու հետ կապված օրենսդրական որոշակի հարցեր:
Մասնավորապես, անդրադարձ է կատարվել գիտական աշխատանքների փորձաքննության նոր կարգի մշակման, կրկնակի քննարկման, համապատասխան իրավական ակտերում որոշակի կարգավորումների հնարավորության, վարչարարական և բովանդակային հարցերում օրենսդրական հստակեցումների հետ կապված խնդիրներին: Այդ կապակցությամբ Արմեն Աշոտյանը հանձնարարել է նախարարության համապատասխան ստորաբաժանումներին Մարդու իրավունքների պաշտպանի գրասենյակին հետաքրքրող օրենսդրական նախաձեռնությունների նախագծերն ուղակել գրասենյակ` կարծիքի:
Հանդիպման ընթացքում կողմերը վստահություն են հայտնել, որ քաղաքացիների կրթության իրավունքի իրացման հարցերը պետք է իրականացվեն բոլոր իրավական ընթացակարգերին համապատասխան: