Ադրբեջանական նավթը շարունակում է էժանանալ

ԵՐԵՎԱՆ, 1 ՕԳՈՍՏՈՍԻ, ԱՐՄԵՆՊՐԵՍ: Վրացական Բաթում, Սուփսա եւ թուրքական Ջեյհան նավահանգիստներով փոխադրվող ադրբեջանական Azeri LT CIF տեսակի նավթն այսօր միջազգային սակարաններում տեղի ունեցած աճուրդներում 1,69 տոկոսով կամ 0,93 դոլարով էժանանալով, մեկ բարելի դիմաց գնահատվել է 54,02 դոլար:

Այս մասին, ինչպես հաղորդում է «Արմենպրես»-ը` վկայակոչելով ադրբեջանական ԶԼՄ-ները, հայտնել է Ադրբեջանի պետական նավթային հիմնադրամի (SOCAR) մամուլի ծառայությունը:

Անցյալ շաբաթվա վերջին ադրբեջանական նավթի մեկ բարելն արժեր 57,71 դոլար, իսկ երեկ` 54,95 դոլար:

Azeri LT CIF տեսակի նավթի նվազագույն գինը` 19,15 դոլար գրանցվել էր 2001 թվականի դեկտեմբերին, իսկ առավելագույն գինը` 149,66 դոլար` 2008 թվականի հուլիսին:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին:

Ադրբեջանի 2015 թվականի պետբյուջեում նավթի գինը մեկ բարելի համար նախատեսված է 90 դոլար: Ներկայում այն արդեն պետբյուջեում նախատեսվածից մոտ 36 դոլարով ցածր է Azeri LT CIF բարձր տեսակի նավթի, 38 դոլարով ցածր` Brent տեսակի նավթի եւ 43 դոլարով ցածր` WTI տեսակի նավթի ներկայիս գնի համեմատ: