The Washington Post-ը բռնապետական Ադրբեջանին համեմատել է Հյուսիսային Կորեայի հետ

ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Աշխարհում բռնապետական ռեժիմների ընտրական կեղծարարությունների մասին The Washington Post թերթում հրապարակված հոդվածում հիշատակվում է նաեւ 2013 թվականին Ադրբեջանում անցկացված նախագահական ընտրություններում ընտրական արդյունքները կեղծելու միջոցով Իլհամ Ալիեւի երրորդ անգամ նախագահ ընտրվելու մասին:

Ինչպես հաղորդում է «Արմենպրես»-ը, համեմատելով Հյուսիսային Կորեայում անցած կիրակի անցկացված քաղաքապետական ընտրություններում ընտրողների 99,97 տոկոս մասնակցության մասին այդ երկրի պետական հեռագրական գործակալության հաղորդագրությունը՝ ամերիկյան հեղինակավոր թերթն այդ առնչությամբ հիշատակում է Ադրբեջանում անցկացված վերջին նախագահական ընտրությունը:

«2013 թվականին նախագահական ընտրություններից մեկ օր առաջ, դեռեւս քվերակությունը չսկսված, Ադրբեջանի կենտրոնական ընտրական հանձնաժողովը բջջային հեռախոսների օգտատերերին հաղորդել էր ընտրությունների արդյունքները: Նշվել էր, որ նախագահ Իլհամ Ալիեւը դարձյալ 72 տոկոս ձայներով հաղթանակ է տարել: Ընդդիմության թեկնածուն էլ, իբր, ընդամենը 10 տոկոս ձայներ է հավաքել: Սակայն, որոշ ժամանակ անց պետական մարմինը հաղորդագրություն էր տարածել, թե իբր հեռախոսներին ուղարկված ցուցանիշները գրանցվել են նախորդ տարիներին անցկացված ընտրությունների ժամանակ եւ հրապարակվել սխալմամբ:

Թերթն ընդգծում է, որ ընտրություններում մասնակցության եւ արդյունքների նման բարձր ցուցանիշները հատկանշական են բռնապետական երկրներին, ինչպիսիք են Հյուսիսային Կորեան, Ադրբեջանը, Ղազախստանը եւ այլն: