Ադրբեջանում անչափահաս հարսների թիվը երկու անգամ աճել է

ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Ադրբեջանում մինչեւ 18 տարեկան ամուսնացող աղջիկների թիվը երկու անգամ աճել է: Ինչպես հաղորդում է «Արմենպրես»-ը` վկայակոչելով modern.az լրատվական կայքը, Ադրբեջանի պետական վիճակագրական կոմիտեի տվյալներով` 2013 թվականին անչափահաս տարիքում ամուսնացած աղջիկների թիվը կազմել է 229, իսկ 2014 թվականին այդ թիվը հասել է 479-ի, գրանցվել է մինչեւ 18 տարեկան երկու տղայի ամուսնության դեպք եւս:

Նշվում է, որ ոչ պաշտոնական տվյալներով` Ադրբեջանում անչափահաս տարիքում ամուսնությունների թիվը պաշտոնական վիճակագրությունից շատ ավելի մեծ է:

Թեեւ Ադրբեջանի օրենսդրությամբ ամուսնական տարիքը կանանց եւ տղամարդկանց համար սահմանված է 18 տարեկանից բարձր, սակայն, «որոշ հարգելի պատճառներով»` տեղական ինքնակառավարման մարմինների թույլտվությամբ քաղաքացիական ակտերի գրանցման կառույցները կարող են գրանցել անչափահասի ամուսնությունը: