Ադրբեջանում «Դինամո»-ի հետ հանդիպմանը ադրբեջանցի երկրպագուները այրել են Վրաստանի դրոշը

ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ: Ադրբեջանական «Գաբալա» ֆոտբոլային թիմի հետ վրացական «Դինամո»-ի պատասխան հանդիպման ժամանակ ադրբեջանցի երկրպագուները հակավրացական պաստառներ են պարզել եւ այրել Վրաստանի դրոշը:Ինչպես հաղորդում է «Արմենպրես»-ը` վկայակոչելով qafqazinfo.az լրատվական կայքը, ադրբեջանցիները պաստառների վրա գրել են, որ Վրաստանի Մարնեուլի, Ռուստավի, Բոլնիսի, Դմանիսի շրջանները, իբր, Ադրբեջանի «վաղնջական հողեր» են:

Պաստառները հեռացվել են ոստիկանության միջամտությունից հետո: Հանդիպմանը մասնակից թիմերի երկրպագուների միջեւ բախումը կանխելու համար մարզադաշտի անվտանգության ծառայությունը Վրաստանից ժամանած երկրպագուներին տեղավորել է տեղացիներից երկաթե ճաղերով անջատված հատվածում:

Թիմերի միջեւ Վրաստանում տեղի ունեցած առաջին հանդիպման ժամանակ վրացի երկրպագուները «Մենք հիշում ենք Կախին եւ Զաքաթալան. 1921» բովանդակությամբ պաստառ էին պարզել, ինչով փորձել են հասկացնել տալ, որ ներկայիս Ադրբեջանի հյուսիսարեւմտյան Կաղի, Զաքաթալայի եւ Բելոքանի շրջանները պատկանել են Վրաստանին:

Նման բովանդակությամբ պաստառներ վրացի երկրպագուները պարզել էին նաեւ 2014 թվականի հուլիսի 31-ին Բաքվում «Նևթչի» եւ վրացական «Չիխուրա» թիմերի միջեւ անցկացված հանդիպման ժամանակ: