ԱՄՆ սենատորները մտահոգված են Ադրբեջանում խոսքի ազատության վիճակով

ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: ԱՄՆ-ի 16 սենատորներ օրերս նամակ են հղել Ադրբեջանի նախագահ Իլհամ Ալիեւին, որում անհանգստություն են հայտնել Ադրբեջանում քաղաքացիական հասարակության եւ խոսքի ազատության վիճակով:

Ինչպես հաղորդում է «Արմենպրես»-ը` վկայակոչելով «Ազատություն» ռադիոկայանը, նամակում սենատորները դժգոհություն են հայտնել Բաքվում «Ազատություն» ռադիոկայանի եւ ԵԱՀԿ գրասենյակների փակվելու առնչությամբ:

Սենատորներն «Ազատություն» ռադիոյի գրասենյակի փակումն անվանել են «Ադրբեջանում խոսքի ազատության հալածանք»:

Նամակում ամերիկացի սենատորներն Ադրբեջանի իշխանություններին նաեւ կոչ են արել ազատ արձակել ձերբակալված իրավապաշտպաններին, ընդդիմադիր ԶԼՄ-ների համար ազատ գործունեություն ապահովել, վերջ դնել քաղաքացիական հասարակության վրա ճնշմանը եւ դրանով վերացնել ԱՄՆ-ի ու Ադրբեջանի միջեւ երկկողմանի հարաբերությունների ամրապնդման համար խոչընդոտները:

Նամակը գրվել է սենատոր Ռիչարդ Դուրբինի նախաձեռնությամբ եւ ստորագրվել եւս 15 ԱՄՆ սենատորի կողմից: