Գերման Ստերլիգովը կհայտնվի Ադրբեջանի «սեւ ցուցակում»

ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Աշխարհառչակ օպերային երգչուհի Լյուբով Կազարնովսկայայից հետո Ադրբեջանի ԱԳՆ-ը պատրաստվում է իր տխրահռչակ «սեւ ցուցակում» ընդգրկել նաեւ Լեռնային Ղարաբաղի Հանրապետությունում հաստատված ռուսաստանցի մեծահարուստ Գերման Ստերլիգովին:Այս մասին, ինչպես հաղորդում է «Արմենպրես»-ը, ադրբեջանական ԶԼՄ-ներին հայտարարել է Ադրբեջանի ԱԳՆ մամուլի խոսնակ Հիքմեթ Հաջիեւը:Ադրբեջանն իր համար ծիծաղելի «սեւ ցուցակ» է հորինել, որում ներառում է Արցախ այցելած տարբեր երկրների պաշտոնյաներին, լրագրողներին, աշխարհահռչակ մարդկանց եւ անգամ ուսանողներին, որոնք, դրա համար, իբր, պետք է ստանան Բաքվի «թույլտվությունը»:

Գերման Ստերլիգովը, նրա կինն ու հինգ երեխաները երեք շաբաթ առաջ Ռուսաստանից տեղափոխվել են Արցախ: Հայտնի մեծահարուստը մտադիր է հիմնավորվել եւ նոր բիզնես սկսել Արցախում, ինչի համար հանձնարարել է իր օգնականներին վաճառել Ռուսաստանում իր ունեցվածքը:

Օրերս Ադրբեջանի ԱԳՆ-ն հայտարարել էր Ստեփանակերտի Սայաթ-Նովայի անվան երաժշտական ուսումնարանում վարպետության դասեր անցկացրած Լյուբով Կազարնովսկայային եւս այդ «սեւ ցուցակում» ընդգրկելու մասին:

«Սա այն հողն է, որտեղ պետք է ստեղծագործել, սա այն հողն է, որտեղ հիմա հանգիստ չէ, սակայն նման միջոցառումներով միայն կարելի է մարդկանց մոտ ճիշտ տպավորություն ստեղծել այն մասին, որ պետք չէ վախենալ Ղարաբաղ այցելելուց: Այստեղ կարելի է բացել հոգին եւ սիրտը եւ միասին արարել», -Ստեփանակերտում հայտարարել է Կազարնովսկայան:

Աշխարհառչակ երգչուհին հայտնել է, որ մտադիր է մոտ ժամանակում Արցախում ներկայացնել Ջուզեպե Վերդիի «Ռեքվիեմ» ստեղծագործությունը, ինչպես նաեւ օպերային ստուդիա բացել Ստեփանակերտում:

Ադրբեջանի ԱԳՆ-ը տխրահռչակ «սեւ ցուցակը» սկսել է հրապարակել 2013 թվականից: 2015 թվականի հունիսի դրությամբ Ադրբեջանի ԱԳՆ-ի անցանկալի անձանց ցուցակում ընդգրկված է 470 մարդ: Նրանց մեծ մասը հայտարարել է, որ իրենց համար միեւնույն է Ադրբեջանի այդ ծիծաղելի ցուցակում հայտնվելը, քանի որ իրենք մարդասիրությունը վեր են դասում քաղաքականությունից: