Լեյլա Ալիևայի պատգամավորի թեկնածու առաջադրվելու մասին լուրերը հերքվել են
1 րոպեի ընթերցում
![Լեյլա Ալիևայի պատգամավորի թեկնածու առաջադրվելու մասին լուրերը հերքվել են](http://armenpress.am/resized/480/static/news/b/2015/07/811506.jpg)
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: «Հեյդար Ալիև հիմնադրամ»-ից հերքել են նախօրեին տարածված լուրերն այն մասին, որ Ադրբեջանի գործող նախագահ Իլհամ Ալիևի դուստրը՝ Լեյլա Ալիևան, ով նաև այդ հիմնադրամի փոխտնօրենն է, իշխող «Յենի Ազերբայջան» կուսակցության կողմից առաջադրվելու է որպես պատգամավորի թեկնածու: Ինչպես հաղորդում է «Արմենպրես»-ը, այս մասին տեղեկացնում է ադրբեջանական Haqqin.az-ը:
Հիմնադրամից տարածած հաղրդագրության մեջ նշվել է, որ թեպետ Ալիևան շատ ակտիվ հասարակական-քաղաքական կյանքով է ապրում, սակայն տեղեկատվությունն այն մասին, որ նա պատրաստվում է առաջադրվել խորհրդարանական ընտրություններում, անհիմն է:
Ավելի վաղ ադրբեջանական modern.az-ը գրել էր, որ իշխող կուսակցության գլխավոր քարտուղարի տեղակալ Սիյավուշ Նովրուզովը հայտնել է, թե Ալիևի դստեր թեկնածությունը 2015 թվականի նոյեմբերին կայանալիք ընտրություններում կառաջադրի իշխող «Յենի Ազերբայջան» կուսակցությունը:Նա տեղեկացրել էր, թե Լեյլա Ալիևայի թեկնածության առաջադրման հարցում կուսակցության անդամները միակարծիք են: