Վրացիները հիշեցրել են իրենց հողերը Ադրբեջանի կողմից բռնակցված լինելու մասին

ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Թբիլիսիում Ադրբեջանի «Գաբալա» եւ Վրաստանի «Դինամո» ֆուտբոլային թիմերի միջեւ անցկացված հանդիպման ժամանակ վրացի երկրպագուները հիշեցրել են, որ ներկայիս Ադրբեջանի կազմում գտնվող հյուսիսարեւմտյան Զաքաթալայի եւ Կախի շրջանները բռնակցվել են Ադրբեջանին:

Ինչպես հաղորդում է «Արմենպրես»-ը, faktxeber.com-ը հայտնում է, որ «Դինամո»-ի երկրպագուները տրիբունաներից կախել են «Հիշում ենք Զաքաթալան եւ Կախին. 1921» բովանդակությամբ «լուրջ քաղաքական» պաստառներ:

UEFA-ի պաշտոնյաների միջամտությունից հետո է միայն հաջողվել երկրպագուներին հանել տալ այդ պաստառները:

Վրաստանում Ադրբեջանի դեսպանը հայտնել է, որ անմիջապես կհետազոտի հարցը:

Դա վրացի երկրպագուների` վրացական հողերը Ադրբեջանին բռնակցված լինելու մասին առաջին հիշեցումը չէ: 2014 թվականի հուլիսի 31-ին Բաքվում «Նեֆթչի» եւ «Չիխուրա» թիմերի միջեւ հանդիպման ժամանակ վրացական թիմի երկրպագուները նման պաստառ էին կախել: Այդ պաստառում Զաքաթալան եւ Կախին նշվել էին որպես Վրաստանի տարածք:

Այն ժամանակ Վրաստանի ԱԳՆ ղեկավար Մայա Փանջիկիձեն հարցի առնչությամբ հայտարարել էր, որ միջադեպը կազմակերպվել է սադրիչների կողմից, որոնք փորձում են փչացնել երկու երկրների միջեւ բարեկամական հարաբերությունները: