1 րոպեի ընթերցում
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: Ազատ ոճի ըմբշամարտի Հայաստանի պատանեկան հավաքականը ուսումնամարզական հավաքի միջոցով նախապատրաստվում է Եվրոպայի առաջնությանը: «Արմենպրես»-ի հաղորդմամբ, այս մասին տեղեկացնում է ըմբշամարտի ֆեդերացիան:
Օգոստոսին Սերբիայում կայանալիք պատանիների ըմբշամարտի Եվրոպայի առաջնությանը լավագույնս նախապատրաստվելու նպատակով ազատ ոճի ըմբշամարտի Հայաստանի պատանեկան հավաքականը գլխավոր մարզիչ Արշակ Հայրապետյանի ղեկավարությամբ այս օրերին ուսումնամարզական հավաք է անցկացնում Ծաղկաձորի օլիմպիական մարզահամալիրում:
Օգոստոսի 4-9-ը Սերբիայի Սուբոտիցա քաղաքում ընթանալու է պատանիների ըմբշամարտի Եվրոպայի առաջնությունը: Ըստ մրցաշարի ժամանակացույցի՝ այդ ստուգատեսում առաջինը մրցապայքարի ոլորտ են ներգրավվելու ազատ ոճի ըմբիշները, որոնք մեդալներ կխաղարկեն օգոստոսի 4-5-ին: