«Հայաստան» հիմնադրամի միջոցներով վերակառուցվում է Խաչարձան համայնքի դպրոցը

ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: «Հայաստան» համահայկական հիմնադրամի արգենտինահայ բարերարներ Արտո եւ Հիլդա Կալչիյաններն այս անգամ հովանավորել են Հայաստանի Տավուշի մարզի Խաչարձան գյուղի դպրոցի վերակառուցումը: 2014թ. ամռանը գյուղում իրենց միջոցներով կառուցված բուժկետի ու բազմաֆունկցիոնալ սրահի բացման ժամանակ պարոն Կալչիյանը ստանձնել է նաեւ գյուղի դպրոցի վերակառուցումը: Ինչպես «Արմենպրես»-ին տեղեկացրին «Հայաստան» համահայկական հիմնադրամից, վերակառուցման եւ վերահատակագծման արդյունքում դպրոցը ձեռք է բերել ճաշարան, ունի նոր տանիք, դռներ ու պատուհաններ: Ընթանում են ներքին հարդարման աշխատանքները. դասասենյակներում հատակները պատվում են վինիլով, իսկ մնացած տարածքներում խտացված գրանիտե սալիկներով: Շենքը կապահովվի գազամատակարարմամբ եւ ջեռուցման համակագով:

Շնորհիվ նորոգման եւ կահավորման` ընթացիկ տարվա սեպտեմբերին դպրոցը նորովի կդիմավորի աշակերտներին: Հիմնադրամի՝ «Համակարգչային դասասենյակներ Տավուշի մարզի 72 դպրոցներին» ծրագրով էլ 2012թ-ին համարգչային տեխնիկա ու համապատասխան գույք է նվիրաբերվել կրթօջախին:

«Կալչիյան ընտանիքը համայնքի մշտական բարեկամն ու բարերարն է: Գյուղին կարեւոր կառույցներ նվիրելուց բացի, ամուսինները գյուղացիներին նաեւ ֆինանսական աջակցություն են ցուցաբերում.100.000-ական դրամ օժանդակություն են ստանում գյուղի նորածին ունեցող ընտանիքները, նախորդ տարի բարերարները մեր 65 դպրոցականներին պայուսակներ ու գրենական պիտույքներ նվիրեցին: Բարերար ընտանիքը նաեւ մեծապես հետաքրքրված է գյուղում մեղվաբուծությունը խթանելու հարցով»,-նշել է Խաչարձանի գյուղապետ Գագիկ Շահնազարյանը:

Սահմանամերձ այս համայնքը շուրջ 480 բնակիչ ունի, որոնցից մի մասը Ադրբեջանից գաղթածներ են: