Դմիտրի Մեդվեդևը Ցեղասպանության 100-րդ տարելիցի կապակցությամբ հեռագիր է հղել Հովիկ Աբրահամյանին
2 րոպեի ընթերցում
ՄՈՍԿՎԱ, 28 ԱՊՐԻԼԻ, ԱՐՄԵՆՊՐԵՍ: Ռուսաստանի վարչապետ Դմիտրի Մեդվեդևը Հայոց ցեղասպանության 100-րդ տարելիցի կապակցությամբ հեռագիր է հղել ՀՀ վարչապետ Հովիկ Աբրահամյանին: Ինչպես հաղորդում է «Արմենպրես»-ը՝ վկայակոչելով ՌԴ կառավարության պաշտոնական կայքը, հեռագրում մասնավորապես ասված է.
«Հարգելի Հովիկ Արգամի,
Այս օրերին մենք հարգանքի տուրք ենք մատուցում պատմության ամենադրամատիկ ողբերգություններից մեկի՝ հայ ժողովրդի ցեղասպանության զոհերի հիշատակին: Սգում ենք 100 տարի առաջ Օսմանյան կայսրությունում տեղի ունեցած զանգվածային բռնաճնշումների հետևանքով զոհվածների համար։ Մարդկության և քաղաքակրթությունների դեմ հանցագործությունների համար չկան և չեն կարող լինել արդարացումներ: Յուրաքանչյուրի պարտքն է հոգատարությամբ պահպանել այդ սարսափելի ողբերգության մասին արդարությունը և անել ամեն ինչ, որպեսզի անցյալի սարսափները երբեք և ոչ մի տեղ չկրկնվեն: Այդ պատմական դասերի անանց նշանակությունը կրկին ընդգծել են Երևանում տեղի ունեցած ոգեկոչման վերջին միջոցառումները:
Ռուսաստանի դաշնության կառավարության և անձամբ իմ անունից Ձեզ և եղբայրական Հայաստանի բոլոր քաղաքացիներին եմ փոխանցում կարեկցանքի և վշտակցության խոսքեր: Մենք կիսում ենք ձեր վիշտն ու ցավը:
Պայծառ հիշատակ զոհերին։ Թող գալիք սերունդներն ապրեն խաղաղության և համերաշխության մեջ»: