1 րոպեի ընթերցում
ԵՐԵՎԱՆ, 28 ԱՊՐԻԼԻ, ԱՐՄԵՆՊՐԵՍ: Հայ ջրացատկորդ Վլադիմիր Հարությունյանը, Գերմանիայի Դրեզդեն քաղաքում անցկացվող ջրացատկի երիտասարդական միջազգային մրցաշարում աշտարակացատկ վարժությունում հավաքելով 507.10 միավոր՝ նվաճել է ոսկե մեդալ:
Հայաստանը ներկայացնող մյուս ջրացատկորդ Ազատ Հարությունյանը աշտարակացատկում 484.10 միավորով արժանացել է բրոնզե մեդալի: Համաժամանակյա (սինքրոն) ցատկ վարժությունում Վլադիմիր և Ազատ Հարությունյան եղբայրները 29 երկիր ներկայացնող մարզիկների շարքում հայտնվել են լավագույն տասնյակում՝ 254.19 միավորով զբաղեցնելով 6-րդ տեղը:
«Արմենպրես»-ի հաղորդմամբ, ջրացատկորդները մարզվում են Դավիթ Համբարձումյանի անվան ջրացատկի օլիմպիական հերթափոխի մասնագիտացված մանկապատանեկան մարզադպրոցում՝ գլխավոր մարզիչ Հրաչյա Չանդիրյանի ղեկավարությամբ: