Հայտնի են շախմատի դպրոցական օլիմպիադայի մարզային փուլի արդյունքները

ԱՐՏԱՇԱՏ, 16 ԱՊՐԻԼԻ, ԱՐՄԵՆՊՐԵՍ: Շախմատի դպրոցական օլիմպիադայի հանրապետական փուլին, որը Երեւանում կանցկացվի մայիսին` Արարատի մարզից կմասնակցեն Արտաշատի ավագ եւ Ազատաշենի հիմնական դպրոցի թիմերը: Դպրոցականների շախմատի 9-րդ օլիմպիադայի մարզային փուլում նրանք վաստակել են, համապատասխանաբար, 14,5 եւ 7 միավոր:

«Արմենպրես»-ի թղթակցի հետ զրույցում մարզպետարանի աշխատակազմի կրթության բաժնի գլխավոր մասնագետ Ալբերտ Պետրոսյանն ասաց, որ մասնակից մյուս չորս թիմերը խաղն ավարտել են հետեւյալ արդյունքնրով. Արարատ քաղաքի թիվ 1 դպրոց` 6 միավոր, Արարատ քաղաքի թիվ 4 հիմնական դպրոց` 6,5 միավոր, Այնթապի թիվ 1 դպրոց` 6 միավոր, Արտաշատ քաղաքի թիվ 1 հիմնական դպրոց` 5 միավոր:

Մարզային փուլին, որն անցկացվել է ապրիլի 8-ին` Արտաշատ քաղաքի թիվ 4 հիմնական դպրոցում` մասնակցել են տարածքային փուլերում հաղթած վեց թիմ` 18 շախմատիստների մասնակցությամբ: Օլիմպիադան, որի գլխավոր մրցավարն էր Արարատի մարզի շախմատի ակադեմիայի գլխավոր մարզիչ Միքայել Մարտիրոսյանը, ընթացել է շվեյցարական մրցակարգով:

Մրցաշարի բոլոր մասնակիցներին Հայ բարեգործական ընդհանուր միության կողմից հանձնվել են նվերներ:

Լիլիթ Մաճկալյան