ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: Պոլսո Հայոց պատրիարքարանը Ցեղասպանության տարելիցի օրը` ապրիլի 24-ին, պատարագ կմատուցի Սուրբ Աստվածածին հայկական եկեղեցում: Ինչպես հաղորդում է «Արմենպրես»-ը, այս մասին տեղեկացնում է «Ակոս»-ը: Թուրքիայի ժամանակով 9:30-ին մեկնարկելիք պատարագին Ցեղասպանության զոհերը կհիշատակվեն որպես «սրբեր» (Հայ առաքելական եկեղեցին` Մայր Աթոռ Սբ Էջմիածնում սրբադասման արարողություն կկատարի ապրիլի 23-ին-խմբ.): Լուրը ներկայացրել են նաև թուրքական լրատվամիջոցները` միաժամանակ տեղեկացնելով, որ պատարագիչ Պոլսո պատրիարքական փոխանորդ Արամ արքեպիսկոտոս Աթեշյանը չի պատրաստվում հնչեցնել «ցեղասպանություն» բառը, փոխարենը կհիշատակի համատեղ ցավի մասին:
Պոլսի Հայոց պատրիարքարանը չի մասնակցի նաև ապրիլի 23-ին` ժամը 19:15 րոպեին, 100 զանգ հնչեցնելու համահայկական ակցիային, երբ Հայ առաքելական եկեղեցու բոլոր թեմերում կղողանջեն զանգերը: