2 րոպեի ընթերցում
ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: Christie's աճուրդային տունն առաջին անգամ մեկ շաբաթվա շրջանակներում կմիավորի իմպրեսիոնիզմի, մոդեռնիզմի եւ հետպատերազմյան արվեստի ստեղծագործությունների աճուրդները, ինչպես նաեւ հատուկ աճուրդ կանցկացնի «Առաջ դեպի անցյալը» խորագրով, տեղեկացնում Է «Արմենպրես»-ը:
Ապրիլի 10-ին Լոնդոնում կայացել Է մի քանի ստեղծագործությունների մամուլի ցուցադրությունը, որոնք Նյու Յորքի աճուրդներում կներկայացվեն մայիսին, այդ թվում՝ Պաբլո Պիկասոյի «Ալժիրցի կանայք» (Օ տարբերակը) ստեղծագործությունը՝ 140 մլն դոլար գնահատիչ արժեքով: Այդ կտավն աճուրդային տան փորձագետները համարում են նկարչի ամենանշանակալի աշխատանքը, որը գտնվում Է մասնավոր ձեռքերում:
«Սովորաբար մենք աճուրդներն անցկացնում են երկու շաբաթ: Բայց այս անգամ որոշեցինք փորձել՝ մեկ շաբաթվա ընթացքում անցկացնել աննախադեպ մասշտաբի եւ աննախադեպ կարեւորության մի շարք աճուրդներ: Դրա պատճառները երկուսն են՝ առաջինը՝ ավելի ու ավելի շատ հաճախորդներ են հետաքրքրվում տարբեր դարաշրջանների ստեղծագործություններով եւ նրանց հարմար կլինի բոլորը միասին տեսնելը: Երկրորդ՝ մենք աճուրդները կանցկացնենք Վենետիկյան բիենալեից անմիջապես հետո, մեր պոտենցիալ գնորդները Վենետիկից կվերադառնան՝ այնտեղ տեսածից ոգեւորված, եւ, ինչպես մեզ Է թվում, նրանք ամենահարմար տրամադրվածությունը կունենան մեր աճուրդների համար»,- ՌԻԱ Նովոստիին պատմել Է Christie's-ի՝ իմպրեսիոնիզմի եւ մոդեռնիզմի բաժնի միջազգային տնօրեն Ջովաննա Բերտացոնին: