Նոր համաձայնագրով հնարավոր կլինի Երևանից գնել տոմսեր ՌԴ-ում գնացքով երթևեկելու համար

ԵՐԵՎԱՆ, 4 ՄԱՐՏԻ, ԱՐՄԵՆՊՐԵՍ: Համագործակից երկրների երկաթուղային տրանսպորտի խորհրդի ուղևորափոխադրումների հարցերով հանձնաժողովի 15-րդ նիստի ընթացքում, որն անցկացվում է Երևանում, ստորագրվեց համագործակցության համաձայնագիր «Հարավկովկասյան երկաթուղի» ՓԲԸ-ի և Ուղևորափոխադրումների ֆեդերալ ընկերության միջև: «Արմենպրես»-ի փոխանցմամբ` այս համաձայնագրով ձեռք է բերվում պայմանավորվածություն, որ Երևանում տերմինալների միջոցով հնարավոր լինի գնել տոմսեր Ռուսաստանում գնացքով երթևեկելու համար:

«Հարավկովկասյան երկաթուղի» ՓԲԸ-ի տնօրեն Վիկտոր Ռեբեցը նշեց, որ նշյալ համաձայնագրով փորձ է արվում առավել բարելավել իրենց կողմից տրամադրվող ծառայությունների որակը: «Ոչ վաղ անցյալում էր, երբ երկաթուղային ուղևորափոխադրումների տոմսերը գրվում էին ձեռքով տեղում, մի նստատեղի համար մի քանի ուղևոր վիճում էր` յուրաքանչյուրն ունենալով իրավունք այդ տեղի համար: Էվոլյուցիայի գործընթացը մեզ համար ակտուալ թեմա է: Թե ումից պետք է օրինակ վերցնեինք, իհարկե, ԱՊՀ տարածքում դա Ուղևորափոխադրումների ֆեդերալ ընկերությունն է, որը պատրաստակամություն է հայտնել փոխանցել իր փորձը: Մենք խորհրդատվություններ ենք ստացել ընկերության ղեկավարության կողմից ու մեր համագործակցության հիմնական ողղություններն ենք նախանշել:Այս համաձայնագրի արդյունքը կտեսնեք հենց վաղը, ձեզնից յուրաքանչյուրը կարող է այստեղից տոմս գնել Ռուսաստանում ցանկացած գնացքի համար»,-ասաց Վիկտոր Ռեբեցը:Համագործակից երկրների երկաթուղային տրանսպորտի խորհրդի ուղևորափոխադրումների հարցերով հանձնաժողովի 15-րդ նիստն ընթանում է Երևանում մարտի 4-6-ը:

Երևանյան նիստի աշխատանքներին մասնակցում են Բելառուսի, Վրաստանի, Ղազախստանի, Լիտվայի, Լատվիայի, Մոդովայի, Ռուսաստանի, Տաջիկստանի, Ուզբեկստանի, Ուկրաինայի, Էստոնիայի երկաթուղային վարչության ներկայացուցիչները:

Ուղևորափոխադրումների ոլորտի ղեկավարներին ո մասնագետները եռօրյա համաժողովի ժամանակ կքննարկեն 2014 թվականի միջազգային երկաթուղային ուղևորափոխադրումների արդյունքները, Մոլդովայի և Բելառուսի միջև սակագների նվազեցման հարցը, «Էքսպրես» միջազգային համակարգի տեխնոլոգիական շահագործման փոփոխությունները:

Համագործակից երկրների երկաթուղային տրանսպորտի խոհուրդը ստեղծվել է 1992 թվականի փետրվարի 14-ին` միջպետական մակարդակով երկաթուղային տրանսպորտի աշխատանքի համակարգման ու գործունեության ընդհանուր սկզբունքների մշակման համար:

Խորհրդի անդամ են Հայաստանը, Ռուսաստանը, Բելառուսը, Ղազախստանը, Ղրղզստատ, Մոլդովան, Տաջիկստանը, Թուրքմենստանը, Ուզբեկստանը, Ուկրաինան, Ադրբեջանը:

Խորհրդի կազմում դիտորդի կարգավիճակ ունեն Երկաթուղայինների և տրանսպորտային շինարարների արհմիությունների միջազգային համադաշնությունը և Իրանի Իսլամական Հանարապետության երկաթուղիները: