Լոնդոնում կայացած բարեգործական համերգի հասույթը կփոխանցվի Սասունիկ գյուղի մանկապարտեզին
1 րոպեի ընթերցում
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Լոնդոնի հեղինակավոր «Սենտ Ջոն Սմիթ Սքվեր» համերգասրահում Միացյալ Թագավորությունում ՀՀ դեսպանության աջակցությամբ փետրվարի 21-ին տեղի է ունեցել «Հայաստան» հիմնադրամի բրիտանական մասնաճյուղի կողմից կազմակերպված ամենամյա ավանդական բարեգործական համերգը:
Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, միջոցառմանը ներկա են եղել Լոնդոնում հավատարմագրված դիվանագետներ, օտարերկրյա հյուրեր, հայ համայնքի ներկայցուցիչներ:
Այս տարի համերգը նվիրված էր Հայոց ցեղասպանության 100-րդ տարելիցին: Ելույթ են ունեցել ճանաչված հայ երգիչներ Լիպարիտ Ավետիսյանը, Վարդուհի Խաչատրյանը, Լիլիթ Սողոմոնյանը և դաշնակահար Արմեն Աղաջանյանը: Երգացանկում ընդգրկվել էին հայ և եվրոպական կոմպոզիտորների հայտնի գործեր:
Համերգից ստացված հասույթը տրամադրվելու է Արագածոտնի մարզի Սասունիկ գյուղի մանկապարտեզին: