Համահայկական հռչակագրում ժամանակակից միջազգային իրավունքին հակասող դրույթներ չկան. Վիգեն Քոչարյան

ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: Հայոց ցեղասպանության 100-րդ տարելիցի համահայկական հռչակագիրն արտացոլում է ամբողջ հայության մոտեցումները, պատկերացումներն այն անելիքների հետ կապված, որոնք Հայաստանն ունի այդ ոլորտում:

ԵՊՀ Եվրոպական և միջազգային իրավունքի ամբիոնի վարիչ Վիգեն Քոչարյանը այս առնչությամբ կարեւորում է հռչակագիրն ու նրա դրույթները: Միաժամանակ, ըստ նրա, եթե հռչակագիրն արտահայտեր զուտ պետության պաշտոնական դիրքորոշումը, հնարավոր էր միջազգային իրավունքի տեսանկյունից ենթատեքստում որոշակի խնդիրներ տեսնել:

«Պետության պաշտոնական դիրքորոշման և ամբողջ ժողովրդի դիրքորոշումներն արտահայտող փաստաթղթերում տարբերություններ են լինում: Սա պետք է հստակ գիտակցել»,- «Արմենպրես»-ի փոխանցմամբ ասաց նա` հավելելով, որ հռչակագրում ոչ մի ծայրահեղական, ժամանակակից միջազգային իրավունքին հակասող դրույթ չկա: Հիմնական մտահոգությունն, ըստ Քոչարյանի, կարող է առաջացնել համապատասխան այն պարտավորությունները, որոնք ՀՀ-ն, դեռևս 1992 թվականից անդամակցելով ԵԱՀԿ-ին, ստանձնել է:

Անդրադառնալով ՀՀ առաջին նախագահ Լևոն Տեր-Պետրոսյանի՝ 100-րդ տարելիցի առթիվ Հայոց ցեղասպանության հարցը միջազգային ասպարեզում հավուր պատշաճի ներկայացնելու խնդրին ու առաջարկություններին` Վիգեն Քոչարյանը շեշտեց, թե առաջին նախագահի առաջարկությունը մի նոր՝ արդեն Հայաստանի Հանրապետության պաշտոնական մոտեցումներն արտացոլող փաստաթուղթ մշակելու մասին է, որ հետաքրքրական գաղափար է եւ միգուցե կարելի է քննարկել: «Այդ դեպքում, իհարկե, պետք է փաստաթուղթն ամբողջությամբ համապատասախանի ժամանակակից միջազգային իրավունքի տառին և ոգուն: Բնական է, որ այդ փաստաթղթի մշակմանը պետք է ներգրավվեն տարբեր անձինք, մասնագետներ, ինչը կարող է մեր հասարակության մեջ մի նոր մշակույթի ձևավորման նախադեպ հանդիսանալ: Ընդդիմության գործառույթը քննադատելն է, բայց կարող են լինել պահեր, երբ պետք է կոնստրուկտիվ գործունեություն ծավալել, և միգուցե այս ոլորտը, որը համազգային խնդիր է, հենց համատեղ աշխատանքի համար կարող է արդյունավետ ասպարեզ հանդիսանալ»,- ասաց Քոչարյանը` հավելելով, որ վերջնական կամ իդեալական փաստաթղթեր չեն լինում, քաղաքականությունը շատ դինամիկ երեւույթ է, եւ քարացած մոտեցումներ հարցի առնչությամբ չեն կարող լինել:

Հունվարի 29-ին Ծիծեռնակաբերդի հուշահամալիրում տեղի է ունեցել Հայոց ցեղասպանության 100-րդ տարելիցի համահայկական հռչակագրի հրապարակման արարողությունը: Հռչակագիրը միաձայն ընդունվել է Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի նիստում: Փաստաթուղթն ընթերցել է Նախագահ Սերժ Սարգսյանը և, ի կատարումն Հայոց ցեղասպանության 100-րդ տարելիցի միջոցառումները համակարգող պետական հանձնաժողովի որոշման, հռչակագրի մայր օրինակը ի պահ է հանձնել Հայոց ցեղասպանության թանգարան-ինստիտուտին: Հանրապետության Նախագահը նշել է, որ հռչակագրի մեկ օրինակը կուղարկվի Միացյալ ազգերի կազմակերպության Գլխավոր քարտուղարին, մեկ օրինակը կհանձնվի Հայաստանի Հանրապետության ազգային արխիվ: