Լեզվաբաններն ապացուցել են մարդկության դրական տրամադրվածությունը

ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: Big Data-ի միջոցով ամերիկացի գիտնականներն ապացուցել են, որ մոլորակի գլխավոր լեզուների կրողները գերադասում են դրական երանգավորմամբ բառերը. «լավ» բառերն ավելի հաճախ են գործածվում, ավելի բազմազան են եւ ավելի հեշտ են յուրացվում: Ինչպես տեղեկացնում Է «Արմենպրես»-ը, հետազոտության արդյունքները ներկայացված են Proceedings of the National Academy of Sciences հանդեսում:

Տակավին 1969 թվականին ամերիկացի երկու հոգեբաններ առաջադրել են «Պոլիաննայի վարկածը». մարդը ենթագիտակցաբար կողմնորոշված Է դեպի բացառապես դրական հաղորդումների ընկալումն ու ստեղծումը (այլ խոսքով՝ իրականության լուսավոր կողմերին ուշադրություն դարձնելը): Այս վարկածն առաջին անգամ ստուգել են միլիարդավոր բառերով: Կինոֆիլմերում արաբական ենթագրեր, կորեական թվիթներ, ռուս դասական գրականություն, չինական վեբ-Էջեր, երգերի անգլալեզու տեքստեր, հոդվածներ Երկրորդ համաշխարհային պատերազմի ժամանակների «Նյու Յորք թայմսում». ամենուրեք մարդիկ ավելի հաճախ գործածում են դրական երանգավորում ունեցող բառեր եւ արտահայտություններ:

Այսպիսով, զանգվածային լրատվամիջոցներում վատ նորությունների ոչ մի առատություն, սարսափ-ֆիլմերը եւ հայհոյանքն ինտերնետ-համաժողովներում չեն կարող հակառակ կողմը շրջել մարդկային լեզվի համընդհանուր դրական տրամադրվածությունը, հայտարարում են գիտնականները:

Մշակելով մի քանի միլիարդ բառ տասը լեզուներում (անգլերեն, իսպաներեն, ֆրանսերեն, գերմաներեն, պորտուգալերեն, ռուսերեն, կորեերեն, չինարեն, ինդոնեզերեն եւ արաբերեն)՝ հետազոտողները որոշել են յուրաքանչյուր լեզվի մոտավորապես տասը հազար առավել գործածվող բառերը: Այնուհետեւ կրողներին խնդրել են գնահատել այդ բառերը ինըբալանոց սանդղակով՝ ամենամռայլից մինչեւ առավել ուրախը: Արդյունքում գիտնականներն ստացել են հինգ միլիոն գնահատական: Օրինակ՝ անգլերեն laughter-ն (ծիծաղ) ստացել Է 8,5, իսկ terrorist-ն (ահաբեկիչ)՝ 1,3 բալ:

Իսպանալեզու Համացանցի բառապաշարը եղել Է ամենադրականը, իսկ չինական գրականությանն՝ առավել մռայլը, սակայն բոլոր լեզուներով 24 աղբյուրներ (գրքերից մինչեւ երգերի տեքստեր) տեղ են զբաղեցրել սանդղակի վերին կեսում (6 – 9): Այլ խոսքով՝ մարդկությունն ուրախ բառերը տխուրներից ավելի հաճախ Է գործածում: