2 րոպեի ընթերցում
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: Ռուսաստանի քննչական կոմիտեի նախագահ Ալեքսանդր Բաստրիկինը եւ Հայաստանի քննչական կոմիտեի ղեկավար Աղվան Հովսեփյանը պայմանավորվել են համատեղ հետաքննել Գյումրիում ընտանքի յոթ անդամների սպանությունը, որում կասկածվում Է ռուսաստանցի ժամկետային զինծառայողը: Այդ մասին, ինչպես տեղեկացնում Է «Արմենպրես»-ը՝ հղում անելով ՌԻԱ Նովոստիին, հայտնել Է ՌԴ-ի ՔԿ-ի պաշտոնական ներկայացուցիչ Վլադիմիր Մարկինը:
«Համակարգելով քննչական խմբերի աշխատանքը՝ Ալեքսանդր Բաստրիկինը եւ Աղվան Հովսեփյանը պայմանավորվել են համատեղ գործունեություն իրականացնել քրեական այն գործերի համակողմանի, ամբողջական եւ անաչառ քննության համար, որոնք հարուցվել են երկու երկրներում»,-ասել Է Մարկինը:
Ավելի վաղ Բաստրիկինը հայտարարել Է, որ Գյումրիում սպանությունների գործով հրապարակային դատական գործընթացը տեղի կունենա Հայաստանում: Նա նշել Է, որ Ռուսաստանը լիակատար փոխըմբռնման Է հասել Հայաստանի հետ, եւ կա այն բանի հստակ պատկերացումը, թե ինչպիսին պետք Է լինի ռուսական իրավասու մարմինների օգնությունը Հայաստանի իրավապահ մարմինների կողմից անցկացվող հետաքննությանը:
Մարկինի խոսքով՝ գործի քննությունը եւ դրա հետ կապված բոլոր պրոցեսուալ գործողություններն անցկացվելու են միջազգային իրավունքի նորմերին եւ երկու երկրների միջեւ ստորագրված փաստաթղթերին համապատասխան: