2 րոպեի ընթերցում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Բանաստեղծ Արա Ալոյանը հանրությանը ներկայացրեց իր ստեղծագործություններն ամփոփող երկու նոր ժողովածու: Հունվարի 17-ին «Հայ գիրք» գրախանութում տեղի ունեցավ Ալոյանի «Մի լուսացիր» և «Ոտնահետքեր ջրաներկով» բանաստեղծությունների ժողովածուների շնորհանդեսը: Երկու գրքերը 2014 թվականին լույս է ընծայել «Արտագերս» հրատարակչությունը:
Արա Ալոյանն ընդգծեց, որ միանգամից երկու գիրք է հրատարակելը պայմանավորված է վերջին տարիների իր առավել արգասաբեր գործունեությամբ:
«Չկամեցա մեկ գրքով ներկայացնել բոլոր այդ ստեղծագործությունները, որովհետև «Ոտնահետքեր ջրաներկով»-ն զորեղ հավատի միտումներ ունի իր մեջ: Երկրորդը՝ «Մի լուսացիր»-ը, սիրո պատվիրանի պես է հնչում, և ավելի շատ սիրերգություն է հիշեցնում, և այս երկու գրքերի, ինչպես և իմ առաջին ժողովածուի ընդհանրությունը սիրերգությունն ու սերն է»,-«Արմենպրես»-ի փոխանցմամբ՝ նշեց Արա Ալոյանը:
Բանաստեղծի խոսքով՝ իր ընթերցողները տարբեր սեռի, զբաղմունքի և նախասիրությունների մարդիկ են: «Իմ ընթերցողը քնարականի հանդեպ հակում ունեցող մարդն է, հուզվող մարդը»,- հավելեց նա:
Շնորհանդեսի մասնակիցները շնորհավորեցին բանաստեղծին երկու գրքերի լույսընծայման առթիվ՝ մաղթելով նրան նորանոր ստեղծագործական ձեռքբերումներ:
Լրագրող, երաժիշտ, բանաստեղծ Արա Ալոյանը գրում է չափածո և արձակ ստեղծագործություններ: Ալոյանի պոեզիան 90-ականների կեսերից պարբերաբար ներկայացվել է հանրապետական գրական մամուլի հարթակներում, հնչել ռադիոեթերից: Ալոյանն արժանացել է Ռուբեն Սևակի անվան ամենամյա գրական մրցանակին: Էլեկտրոնային և տպագիր մամուլում հանդես է գալիս ինչպես գեղարվեստական ստեղծագործություններով, այնպես էլ հրապարակախոսական հոդվածներով, գրականագիտական ակնարկներով: Ալոյանի ստեղծագործությունները զետեղվել են տարբեր ալմանախներում, ժողովածուներում: 2003 թվականին հրատարակել է «Լույս դառնալուց առաջ» բանաստեղծությունների ժողովածուն: