1 րոպեի ընթերցում
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: Շախմատի Հայաստանի հավաքականի առաջատար Լևոն Արոնյանի կարծիքով, Վեյկ ան Զեեի «Տատա Սթիլ» մրցաշարում կարելի է մեկ անգամ պարտվել:
«Մի պահ միտքս մթագնեց: Խաղային դիրքս շատ հետաքրքիր էր: Ավելի քան 35 րոպե մտածում էի այդ դիրքի մասին: Սակայն վստահ չէի խաղային դիրքս գնահատելու պահով: Տպավորություն կա, որ սևերի մոտ ամեն ինչ պետք է լավ դասավորվի: Նման բաներ լինելու են, կյանքը շարունակվում է, և ինչպես փորձն է ցույց տալիս` մեկ խաղում կարել է պարտվել»,-«Արմենպրես»-ի հաղորդմամբ, Արոնյանի խոսքը մեջ է բերում Chessnews կայքը:
Արոնյանը երրորդ տուրում խաղում էր Սո Վեսլիի հետ: Հայ շախմատիստը խաղում էր սև խաղաքարերով: 54 քայլ կատարելուց հետո Արոնյանը զիջեց մրցակցին: Այս տուրից հետո Արոնյանն ունի միայն մեկ միավոր: Հաջորդ տուրում Արոնյանը կխաղա Վոյտաշեկի հետ: