3 րոպեի ընթերցում
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ:«Արմենպրես»լրատվական գործակալությունը շարունակում է ձեզ ներկայացնել «Նոր գիրք» նախագիծը: Այն ամեն երկուշաբթի ձեր դատին է հանձնում հայաստանյան հրատարակչությունների լույս ընծայած գեղարվեստական գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի վերաբերյալ, ծանոթանալ դասական երկերին և արդի գրականության զարգացման միտումներին: Մեր ցանկերից ընտրեք այն գրքերը, որոնք ձեզ դուր են գալիս և սկսեք ընթերցել:
Այս շաբաթ«Արմենպրես»-ը դարձյալ առանձնացրել է տարբեր հրատարակչությունների նոր հրատարակած և հանրության դատին հանձնած չորս ուշագրավ գրքեր՝ չորս խորագրերի ներքո:
Հայ դասական գրականություն
Երվանդ Օտյան, «Ընկեր Բ. Փանջունի»
Երվանդ Օտյանի «Ընկեր Բ. Փանջունի» երգիծական վեպը լույս է տեսել «Իմ գրադարանը» մատենաշարով: Երվանդ Օտյանի ստեղծագործությունները ընդգրկված են ՀՀ հանրակրթական դպրոցի և բուհական ընդունելության քննությունների ծրագրերում: Գիրքը հասցեագրված է ոչ միայն Հայաստանի դպրոցականներին, այլև աշխարհասփյուռ հայ պատանիներին ու պարմանուհիներին, ինչպես նաև մեծահասակ ընթերցողներին, բոլոր նրանց, ովքեր չեն կորցրել իրենց հետաքրքրությունը հայ բազմադարյան գրականության նկատմամբ: Խմբագիր՝ Աշոտ Գաբրիելյան: Գիրքը հրատարակել է «Էդիթ Պրինտ»-ը:
Ժամանակակից գրականություն
Նարեկ Կիրակոսյան
«Մեդիտացիա»
Հեղինակի երկրորդ գիրքն է, ուր զետեղված են բանաստեղծություններ և էսսեներ:
Բառի կշիռն ու բառի միջանկյալ լռությունն իր զգայարաններում կրող բանաստեղծը փորձում է վերարտադրել ներաշխարհում կուտակված մտավարժանքների ալքիմիան, որ ժամանակի ու տարածության մեջ գոյություն ունեցող բացակա պատկերների թափանցիկ սինթեզն է: Գիրքը հրատարակել է «Էդիթ Պրինտ»-ը:
Թարգմանական գրականություն
Էռնեստո Սաբատո, «Թունելը»
«Թունելը» վեպում Էռնեստո Սաբատոն իր հերոսի՝ նկարիչ Կաստելի գիտակցության միջոցով ապացուցում է, որ հույսը, որպես այդպիսին, գոյություն չունի, և որ մարդկային գիտակցությունը երբեք չի կարող հասնել անվերապահ կամ բացարձակ սիրո: Իսպաներենից թարգմանեց Ռուզաննա Պետրոսյանը: Խմբագիր՝ Արքմենիկ Նիկողոսյան: Գիրքը հրատարակել է «Անտարես»-ը:
Մանկապատանեկան գրականություն
Բրիգիտե Վերներ, «Դենին, Կլարան եւ համար 5 տունը»
Մանկապատանեկան տարիքի ընթերցողների համար նախատեսված այս վեպը պատմում է Դենի անունով տղայի մասին, ով իր յուրահատուկ արտաքինով եւ պահելաձեւով տարբերվում է բոլորից: Գրքի հերոսուհին` Կլարան, հասկանում է, որ շփումը Դենիի հետ անչափ հետաքրքիր է: Գրքում նկարագրվում են նրանց հետաքրքիր արկածները համար հինգ տանը: Գիրքը հրատարակել է «Անտարես»-ը:
«Նոր գիրք»-ը ներկայացրեց Ռոզա Գրիգորյանը