2 րոպեի ընթերցում
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: Վատիկանի մշակույթի քահանայապետական խորհրդի նախագահ Ջանֆրանկո Ռավազինկարծում է, որ Հայաստանի ողջ տարածքում և ամբողջ աշխարհում սփռված խաչքարերը աղաղակում են հայոց պատմության մասին: Նա ցավում է, որ ժողովուրդների բախման արդյունքում տեղի են ունենում այնպիսի վայրագություններ, երբ ոչնչացվում են հայկական խաչքարերը: «Ես խորապես հուսով եմ, որ այսօր Փարիզում երկու երկրների ղեկավարների հանդիպումը կդառնա որոշիչ ապագայում նման վայրագությունների կրկնությունը կանխելու հարցում:Որպես մշակույթի քահանայապետության խորհրդի նախագահ` ինքս տարիներ առաջ դիմել եմ ՅՈՒՆԵՍԿՕ-ի գլխավոր քարտուղարին, որ ամեն ինչ արվի փրկելու այդ կարևոր պատմական վավերագրերը` Ջուղայի խաչքարերը»,-«Արմենպրես»-ի հաղորդմամբ` ասաց Ջանֆրանկո Ռավազին` պատասխանելով հարցին, թե ինչպես է կարդինալը վերաբերում Ադրբեջանի կողմից Հին Ջուղայի խաչքարերի ոչնչացմանը:
«Հայկական խաչքարերը, որոնք տարածված են ձեր ամբողջ տարածքով, բղավում են ձեր պատմության մասին: Դուք պետք է արժեվորեք այն հուշարձանները, եկեղեցիները, ձեռագրերը, որոնք հանդիսանում են ձեր պատմության կարևորագույն մասը»,- նշեց կարդինալը:
Տասը հազարից ավելի խաչքար է հաշվարկվել Հին Ջուղայի տարածքում, որը տարբեր ժամանակներում ոչնչացվել է: Վերջին բնաջնջումն Ադրբեջանի կառավարության կողմից տեղի է ունեցել 2005-2006 թվականներին, երբ ոչնչացվել է Ջուղա քաղաքի հայկական գերեզմանոցն` իր հազարավոր խաչքարերով։
