2 րոպեի ընթերցում
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Փարիզի միջազգային ավտոսալոնը, որը հոկտեմբերի 19-ին ավարտել է իր աշխատանքը, երկու շաբաթվա ընթացքում ընդունել է ավելի քան 1,25 մլն այցելուների: Ինչպես տեղեկացնում է «Արմենպրես»-ը, այս տվյալները հայտնել է ցուցահանդեսի գլխավոր կոմիսար Թիերի Հեսը:
«Մենք հասանք մեր նպատակին՝ ցուցադրելով, որ Փարիզի սալոնն ամենաժողովրդականն է աշխարհում եւ այցելուների թվաքանակով գերազանցել է անցյալ տարի անցկացված Մայնի Ֆրանկֆուրտի սալոնին՝ նրա 900 հազար այցելուներով»,- ասել է Հեսը: Նա հատուկ ուշադրություն է դարձրել «օտարերկրյա այցելուների թվի կտրուկ աճի» վրա:
Փորձագետներն առանձնակի կարեւորություն են տալիս ավտոսալոնի հաճախելիության վերաբերյալ տվյալներին: Դա ամենից առաջ կապված է այն բանի հետ, որ մի քանի տարի շարունակ վաճառված տոմսերի թիվը շարունակ նվազում էր, եւ անցյալ տարի սալոն էր այցելել «ընդամենը» 1,23 մլն մարդ: Երկրորդ, ավտոմոբիլների համաշխարհային ստուգատեսի աճող ժողովրդականությունը նշանակում է, որ Ֆրանսիայում եւ աշխարհամասի մյուս պետություններում կա պոտենցիալ գնորդների մեծ խումբ, ինչը խիստ կարեւոր է ճյուղի համար, որը Եվրոպայում լուրջ ճգնաժամ է ապրում:
Ինչպես նշել է Թիերի Հեսը, այս տարի ավտոսիրողների շրջանում զգալի հետաքրքրություն են առաջացրել հիբրիդային ուժային կայանքներով ավտոմեքենաները, ինչպես նաեւ շարժիչների գազերի արտանետման ցածր մակարդակով մոդելները, հաղորդել է ՏԱՍՍ գործակալությունը: