2 րոպեի ընթերցում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: Ամերիկացի զինվորականները 1950-ական թվականների վերջին դիտարկում Էին Լուսնի մակերեւույթին կամ դրա մոտ ատոմային ռումբի պայթյուն իրականացնելու հնարավորությունը: Տիեզերական տարածությունում ռազմավարական գերազանցության հասնելու ԱՄՆ-ի այդ եւ մյուս պլանների մասին հայտնի Է դարձել ամերիկյան Newsweek հանդեսի լրագրողներին, որոնց հաջողվել Է ծանոթանալ ԱՄՆ-ի գաղտնազերծված կառավարական արխիվներին:
Ինչպես հետեւում Է փաստաթղթերից, Լուսնի վրա ատոմային պայթյունի գաղափարն առաջարկել են ԱՄՆ-ի ռազմաօդային ուժերի՝ Նյու Մեքսիկոյի նահանգում գտնվող հատուկ սպառազինությունների մշակման կենտրոնի վերլուծաբանները: Այդօրինակ գործողության իրականացումը հետապնդում Էր ինչպես գիտական, այնպես Էլ քաղաքական բնույթի նպատակներ: «Դա կդառնար մեր տեխնոլոգիական հնարավորությունների ցուցադրությունը»,-ասված Է վերլուծաբաններին տրամադրված նախագծի հիմնավորման մեջ:
Մոտավորապես նույն այդ ժամանակ Պենտագոնը ծրագրում Էր ռազմակայան ստեղծել Լուսնի վրա: Նախագիծն ստացել Էր Horizon կոդային անվանումը: Ենթադրվում Էր ռազմակայանն օգտագործել նախեւառաջ ռադարներ տեղակայելու եւ Երկրագնդի մակերեւույթի օբյեկտները դիտարկելու համար: Այդ հավակնոտ նախագծի իրագործումը կպահանջեր 74 հրթիռի արձակում:
Ռազմակայանը, որում նախատեսվում Էր տեղավորել 12 զինծառայողների, պլանավորվում Էր բացել մինչեւ 1966 թվականի նոյեմբերը: Պաշտպանության նախարարության գնահատումների համաձայն՝ ծրագրի իրագործումը կարող Էր նստել 6 մլրդ դոլար, հաղորդել Է ԻՏԱՌ-ՏԱՍՍ-ը: