ԵՐԵՎԱՆ, 4 ՕԳՈՍՏՈՍԻ, ԱՐՄԵՆՊՐԵՍ:«Արմենպրես» լրատվական գործակալությունը շարունակում է իր ընթերցողներին ներկայանալ յուրահատուկ գաղափարներով ու նախագծերով: Այսուհետև ամեն երկուշաբթի գործակալության կայքում կարող եք տեղեկություն ստանալ այս տարի հայկական հրատարակչությունների նախաձեռնությամբ հրատարակված գրքերի մասին, կարդալ գրքերի նկարագրությունը, ծանոթանալ դասական և արդի գրականության զարգացման միտումներին: Մենք շարունակում ենք ձեզ ներկայացնել «Նոր գիրք» նախագիծը:

Այս շաբաթկրկին «Արմենպրես»-ն առանձնացրել է 2014 թվականին հրատարակված և հանրության դատին հանձնված տարբեր հրատարակչությունների չորս ուշագրավ գրքեր՝ չորս խորագրերի ներքո:

Հայ դասականների գործեր

«Ականջդ բեր ասեմ: Սևակյան իմաստախոսություններ»

Գրքում տեղ են գտել հայրենիքին ու հայրենասիրությանը, լեզվին, արվեստին, մշակույթին, սիրուն, բնությանն ու հողին նվիրված, հայ և համաշխարհային գրականության, արվեստի, գիտության ու հասարակական-քաղաքական նշանավոր գործիչներին և իր ժամանակակիցներին նվիրված Պարույր Սևակի խոհափիլիսոփայական ավելի քան 1100 իմաստախոսություն: Գիրքը նախատեսված է բանաստեղծի ստեղծագործություններով հետաքրքրվող մասնագետների, ուսուցիչների, ուսանողների, դպրոցականների և ընթերցող լայն շրջանների համար: Գիրքը բաղկացած է 248 էջից: Այն հրատարակել է «Էդիթ Պրինտ»-ը:

Ժամանակակից գրողների գործեր

Էդուարդ Խաչիկյան «Ղեբուբան կամ արքայի գործակալը»

«Ղեբուբան կամ արքայի գործակալը» վեպն ընդգրկում է Եդեսիայի առաջին քրիստոնյա արքա Աբգարի և Հայաստանում Արշակունյաց գահատոհմի հիմնադիր Տրդատ Ա-ի գործունեության ժամանակաշրջանը, թե ինչպես Հայոց աշխարհը կարողացավ անձնվեր հայրենասերների շնորհիվ փաստացի անկախանալ Հռոմից:

Վեպն առանձնանում է հետաքրքիր, ուրույն պատումով, դեպքերի զարգացման կլանիչ հետաքրքրությամբ: Պատմավեպի գլխավոր հերոսներից մեկը՝ Ղեբուբան, սովորական բուժակից աճում, դառնում է թագավորի գաղտնի գործակալության ղեկավար-նախարար՝ մեծ ներդրում ունենալով երկրի կայացման, դավադրությունների բացահայտման ու անկախության գործում: Գիրքը բաղկացած է 374 էջից: Այն հրատարակել է «Էդիթ Պրինտ»-ը:

Թարգմանություն այլ լեզվից

Ուոլթեր Այզեքսոն «Սթիվ Ջոբս»

Գիրքը մեր ժամանակների մեծագույն անհատականություններից մեկի՝ Սթիվ Ջոբսի կյանքի ու գործունեության փաստառատ տարեգրությունն է՝ լեցուն ուսանելի մանրամասներով: Անգլերենից թարգմանել են Դավիթ Պ. Վարդազարյանը և Աստղիկ Աթաբեկյանը: Գիրքը բաղկացած է 696 էջից + 16 էջ ներդիր: Այն հրատարակել է «Անտարես»-ը:

Մանկական գրականություն

Կառլո Կոլլոդի«Պինոկիո»

Պինոկիո խամաճիկի անհավանական արկածները վաղուց են գրավել անհամար փոքրիկ ընթերցողների սրտերը:

Հրաշալի, գողտրիկ նկարազարդումներն արտացոլում են այս անմահ պատմության ողջ հմայքն ու ոգին: Թարգմանությունը`Ալվարդ Ջիվանյանի, նկարազարդումները`Մանուելա Ադրեանիի: Գիրքը բաղկացած է 80էջից: Այն հրատարակել է «Զանգակ»-ը:

«Նոր գիրք»-ը ներկայացրեց Ռոզա Գրիգորյանը