Գյումրու Ասլամազյան քույրերի պատկերասրահը լավագույնն է ճանաչվել «Թանգարանային գիշեր-2014» մրցույթում
3 րոպեի ընթերցում
ԳՅՈՒՄՐԻ, 12 ՀՈՒՆԻՍԻ, ԱՐՄԵՆՊՐԵՍ: Գյումրու Ասլամազյան քույրերի պատկերասրահը լավագույնն է ճանաչվել «Թանգարանային գիշեր-2014» մրցույթում: Մրցույթը հայտարարվել էր «Արի թանգարան» ֆեյսբուքյան էջի կողմից: Մրցույթին մասնակցելու հայտ ներկայացրել էր Հայաստանում գործող 11 թանգարան: Ինչպես «Արմենպրես»-ին տեղեկացրեց նախաձեռնության հեղինակ Աշոտ Հարությունյանը, մրցույթը ծնվել է թանգարաններն ավելի ակտիվ դարձնելու, թանգարանների ճանաչմանը նպաստելու նպատակով: Մրցույթին, բացի Երևանից և Գյումրիից, մասնակցել են նաև հանրապետության այլ քաղաքների թանգարաններ: Լավագույն թանգարանը որոշվել է օն-լայն քվեարկության արդյունքում: «Մրցույթը շատ հետաքրքիր ծավալվեց: Մենք չէինք սպասում, որ 33 հազար մարդ կհետևի մրցույթին: Ընդհանուր առմամբ մրցույթին մասնակցեց 1250 մարդ, եղավ քննարկում: Արդյունքում, աչքի ընկան երկրորդ պլանի թանգարանները: Գյումրու «Ասլամազյան քույրերի պատկերասրահ»-ի մասին Երևանում շատերն իմացան, մեզ հիմա շատ հարցեր են տալիս այս թանգարանի մասին: Մրցույթի հաջողությունն այն էր, որ մարզերի թանգարաններն առավել ակտիվ եղան»,-նշեց Աշոտ Հարությունյանն` ավելացնելով, որ առաջիկա նպատակներից է «Արի թանգարան» էջը դարձնել համացանցային բազայի ներկայացուցիչ և ստեղծել Հայաստանի բոլոր թանգարաններն ու հուշարձաններն ամփոփող կայք:
Ի դեպ, նախաձեռնությունը ոլորտի երիտասարդ մասնագետներինն է, ովքեր ծրագիրն իրականացրել են իրենց անձանական միջոցների հաշվին: «Մրցույթը կկրի շարունակական բնույթ: Մենք միշտ պատրաստ կլինենք համագործակցել ցանկացած թանգարանի հետ, լուսաբանել իրենց ծրագրերն ու խնդիրները, ներկայացնել թանգարանն այնպիսին, ինչպիսին կա»,- ավելացրեց Աշոտ Հարությունյանը:
Գյումրու Ասլամազյան քույրերի պատկերասրահը բացվել է 1987 թվականին, որոշակի դադարից հետո այն վերաբացվել է 2004 թվականին: Պատկերասրահում ներկայացված են Երանուհի և Մարիամ Ասլամազյան քույրերի աշխատանքները: Պատկերասրահի ֆոնդում կա 620 կտոր գործ:»Արմենպրես»-ին ներկայացնելով իրենց խնդիրները՝ պատկերասրահի տնօրենի ժամանակավոր պաշտոնակատար Նարինե Հայկազյանը տեղեկացրեց, որ թեև այս պահին, Գյումրու քաղաքապետարանի աջակցությամբ, պատկերասրահի առաջին հարկում կատարվում են կոսմետիկ նորոգման աշխատանքներ, սակայն պատկերասրահի առջեւ ծառացած գլխավոր խնդիրը ջեռուցման խնդիրն է: «Ունենք նաև նոր ցուցանակների ու շրջանակների խնդիր: Պատկերասրահն ավելի լավ կգործի ու ավելի շատ այցելուներ կունենա, եթե զբոսաշրջային գործակալություններն իրենց փաթեթների մեջ ներառեն նաև թանգարաններն ու պատկերասրահները»,-ավելացրեց Նարինե Հայկազյանը:
Արմենուհի Մխոյան