2 րոպեի ընթերցում
ԵՐԵՎԱՆ, 13 ՄԱՅԻՍԻ, ԱՐՄԵՆՊՐԵՍ: ՀՀ փոխվարչապետ, տարածքային կառավարման նախարար Արմեն Գեւորգյանն այսօր` մայիսի 13-ին, Արարատի մարզպետարանի աշխատակազմին, հանրապետական գործադիր մարմինների տարածքային ստորաբաժանումների, համայնքների ղեկավարներին է ներկայացրել Արարատի նորանշանակ մարզպետ Ռուբիկ Աբրահամյանին: Ինչպես «Արմենպրես»-ին տեղեկացրին ՀՀ տարածքային կառավարման նախարարության հասարակայնության հետ կապերի բաժնից, փոխվարչապետը շնորհակալություն է հայտնել նախկին մարզպետ Արամայիս Գրիգորյանին՝ համատեղ արդյունավետ աշխատանքի համար եւ հաջողություններ մաղթել նոր պաշտոնում:
Նորանշանակ մարզպետին ներկայացնելով՝ փոխվարչապետը նշել է, որ նա պետական մարմիններում երկարամյա աշխատանքի փորձ ունի, քաջատեղյակ է մարզում առկա խնդիրներին եւ վստահություն է հայտնել, որ նրա փորձն ու գիտելիքներն օգտակար կլինեն նոր պաշտոնում հաջողությունների հասնելու համար: Նորանշանակ մարզպետին նա արդյունավետ աշխատանք է մաղթել՝ հույս հայտնելով, որ համայնքների ղեկավարների, մարզային կառույցների հետ համագործակցաբար կհաջողվի մարզի սոցիալ-տնտեսական զարգացմանն ուղղված ծրագրեր կյանքի կոչել: Փոխվարչապետն ընդգծել է, որ մարզի խնդիրները գտնվելու են կառավարության մշտական ուշադրության կենտրոնում, եւ տարբեր ոլորտներում իրականացվող ծրագրերը շարունակվելու են: