Հայաստանում երկու ամսում ավելի քան 100 հազար մարդ ցանկացել է նույնականացման քարտ եւ կենսաչափական անձնագիր ունենալ
2 րոպեի ընթերցում
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: Հայաստանում այս տարվա առաջին երկու ամիսներին նույնականացման քարտ եւ կենսաչափական անձնագիր ստանալ ցանկացողները գրեթե նույնքան են, որքան ամբողջ 2012 թվականի ընթացքում: Այս մասին «Արմենպրես»-ի հետ զրույցում նշեց ՀՀ ոստիկանության անձնագրային ու վիզաների վարչության պետ Նորայր Մուրադխանյանը` տեղեկացնելով, որ այս տարվա հունվար- փետրվարին մուտքագրվել է 82 հազար 383 նույնականացման քարտ եւ 20 հազար 279 կենսաչափական անձնագիր ստանալու դիմում: «Դիմողների հիմնական մասի անձնագրերըվավեր են, չնայած հանգամանքին` մեր հայրենակիցները ցանկանում են ստանալ կենսաչափական անձնագիր: Քաղաքացիների հոսքով պայմանավորված էլ անձնագրային որոշ ստորաբաժանումներում հերթեր էինառաջացել»,-նշեց ոստիկանության գնդապետը: Երեւանի 13 ծառայություններից 10-ում համապատասխան սարքավորումներ են տեղադրվել, եւ ներկայում կուտակումներ արդեն գրեթե չկան: Առաջիկայում Անձնագրային ու վիզաների վարչությունը եւս 48 սարքավորում ձեռք կբերի:
2012 թ. Հայաստանում ներդրվեց էլեկտրոնային տվյալներ պարունակող ինքնությունը հավաստող փաստաթղթերի համակարգը: Նույնականացման քարտը նախատեսվեց ներքին շրջանառության` ինքնությունը եւ քաղաքացիությունը հավաստող, իսկ կենսաչափական տվյալներ պարունակող անձնագիրը` որպես երկրի սահմաններից դուրս գործածելու փաստաթուղթ: 2012 թ. հունիսի 1-ից մինչեւ 2013 թ. դեկտեմբերի 31-ը նույնականացման քարտ ստացել է 90 հազար 224 եւ կենսաչափական անձնագիր` 4 հազար 958 քաղաքացի: Ներկայում գործող անձնագրերը ուժի մեջ են մինչեւ վավերականության ժամկետի ավարտը, կարող է գործածվել նաեւ երկրի սահմաններից դուրս գալու դեպքում: