3 րոպեի ընթերցում
ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: ՀՀ արդյունաբերողների և գործարարների (գործատուների) միության անդամները հարգանքի տուրք մատուցեցին հայ մեծանուն բարերար Ալեքսանդր Մանթաշովին նրա ծննդյան օրը` մարտի 3-ին: Միության անդամները ծաղիկներ դրեցին բարերարի Երևանի Աբովյան փողոցում կանգնեցված հուշարձանին:
«Արմենպրես»-ի փոխանցմամբ` լրագրողների հետ զրույցում միության նախագահ Արսեն Ղազարյանը նշեց, որ իրենք նման նախաձենությամբ հանդես են գալիս արդեն երկրորդ անգամ:
«Նախորդ տարի մենք խոսք տվեցինք, որ ամեն տարի հարգանքի տուրք ենք մատուցելու հայ գործարարին, ում կերպարն առ այսօր անգերազանցելի է և օրինակելի մեզ համար: Մանթաշովը մարդ էր, ով արդյունաբերական և ֆինանսական կապիտալի հենասյունն էր ռուսական կայսրությունում, մարդ, ով հայ համայնքի, հայ մշակույթի պահպանման ջատագովն էր»,- ասաց Ղազարյանը:
Նրա գնահատմամբ, մեծ բարերարի բարոյական կերպարը պետք է ընդօրինակվի մերօրյա հայ գործարարության մեջ:
«Ամեն մի հիշատակում, խորհրդանշական լինելով հանդերձ, ունի նաև բարոյական բովանդակություն»,- ընդգծեց միության նախագահը` հավելելով, որ գործարարների համար մշտապես արդիական պետք է լինի Մանթաշովի գաղափարների վերհանումը:
«Գործարարներն առաջինը պետք է լինեն սոցիալապես պատասխանատու, որպեսզի հասարակությունն իրենց ընդունի որպես գործատուների, ովքեր ստեղծում են աշխատանք: Կարևոր է, որ քաղքենիության, ագահության կողքին մանթաշովականություն սերմանվի մեր գործարարության մեջ: Հայաստանում էլ կա գոծարարի այն տեսակը, ով մտածում է իր աշխատողի, իր համայնքի մասին»,- նշեց գործարարը:
Նա համաձայն չէ «օլիգարխ» բնորոշման հետ, փոխարենը նախընտրում է «գործարար» եզրույթը:
«Հայաստանը չունի այն ռեսուրսները, որի հիման վրա կարող են ձևավորվել մեր պատկերացրած օլիգարխները, մենք ունենք խոշոր հարկատուներ, մարդիկ, ովքեր գերակա դիրք ունեն շուկայում և խոշոր աշխատատեղեր են ստեղծում: Մենք ունենք այդ խավը թե միությունում, թե միությունից դուրս իրենց ծրագրերով և տարբեր ոլորտներում իրենց բարեգործական ծրագրերով»,- հավաստիացրեց Ղազարյանը:
Լեզվի պետական տեսչության պետ, Մանթաշովի մասին պատմող ֆիլմի հեղինակ Սերգո Երիցյանը նշեց, որ Մանթաշովը անքակտելի ամբողջացնում էր ոչ միայն գործարարի, այլև բարերարի կերպարները:
«Ամենակարևոը` Մանթաշովը իր ոչ մի մեծ բարերարությանը ներկա չգտնվեց»,- նշեց Երիցյանը:
ՀՀ արդյունաբերողների և գործարարների (գործատուների) միության աջակցությամբ վերահրատարակվել է Մանթաշովի կյանքի և գործունեության մասին պատմող գիրք, նկարահանվել է ֆիլմ, ինչպես նաև Թբիլիսիում գտնվող նրա գերեզմանի վրա կիսանդրի է տեղադրվել:
Ալեքսանդր Մանթաշովը ծնվել է 1842 թվականի մարտի 3- ին` Թիֆլիսում, ապրել` պատիվ բերող կյանք, դեռեւս իր կենդանության օրոք ճանաչվել ոչ միայն ամենահարուստ, այլեւ ամենաշռայլ բարեգործ հայը: