Սթիվեն Սփիլբերգը, Forbes-ի վարկածով, գլխավորել է տասն ամենաազդեցիկ հռչակավոր անձանց վարկանիշը
3 րոպեի ընթերցում
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Ամերիկացի ռեժիսոր Սթիվեն Սփիլբերգը գլխավորել է տասն ամենաազդեցիկ հռչակավոր անձանց վարկանիշը, որը Forbes հանդեսը հրապարակել է հունվարի 15-ին, տեղեկացնում է «Արմենպրես»-ը:
Հրատարակությունը հիշեցնում է, որ Սփիլբերգի վերջին ֆիլմը՝ «Լինքոլնը», որը պատմում է ստրկությունը վերացնելու համար ԱՄՆ-ի 16-րդ նախագահ Աբրահամ Լինքոլնի պայքարի մասին, ոչ միայն երկու «Օսկար» է ստացել, այլեւ հսկայական գումար է հավաքել վարձույթում՝ 275 մլն դոլար: Ինչպես ցույց է տվել հասարակական կարծիքի հարցումը, որն անցկացվել է E-Poll հետազոտական ընկերության կողմից, Սփիլբերգին «ազդեցիկ դեմք» է համարում հարցված ամերիկացիների 47 տոկոսը:
Վարկանիշի երկրորդ տեղում ամերիկացի հայտնի հեռուստահաղորդավարուհի Օփրա Ուինֆրին է: Անցյալ տարի նա զբաղեցնում էր ցուցակի վերին հորիզոնականը:
Առաջատարները «եռյակը» եզրափակում է ամերիկացի մեկ այլ հայտնի ռեժիսոր, «Աստղային պատերազմներ» լեգենդար սագայի ստեղծող Ջորջ Լուկասը: Forbes-ը հիշեցնում է, որ Լուկասը 2012 թվականին «Աստղային պատերազմներ»-ի արտադրող ֆիրման՝ Lucasfilm-ը, վաճառել է Walt Disney Company կինոստուդիային: Այժմ նա գործնականում ամբողջ ժամանակը տրամադրում է ընտանիքին. անցյալ տարվա ամռանը նա աղջիկ է ունեցել: Մինչդեռ 2015 թվականի դեկտեմբերին նշանակված է «Աստղային պատերազմներ»-ի հերթական՝ յոթերորդ մասի պրեմիերան:
Ինչպես նշում Է ԻՏԱՌ-ՏԱՍՍ-ը, վարկանիշի չորրորդ եւ հինգերորդ տեղերն զբաղեցնում են ամերիկացի եւս երկու ռեժիսորներ՝ Ռոն Հովարդը եւ Մարտին Սկորսեզեն: Դերասան Լեոնարդո Դի Կապրիոն օրերս «Ոսկե գլոբուս» կինոմրցանակ է ստացել Սկորսեզեի վերջերս էկրան բարձրացած «Գայլը Ուոլսթրիթից» ֆիլմում խաղացած դերի համար:
Forbes-ը վեցերորդ տեղը հատկացրել է Մեհմեդ Օզին՝ «Դոկտոր Օզի շոուն» ժողովրդականություն վայելող հեռուստածրագրի հաղորդավարին: Նրան հաջորդում են ամերիկացի նշանավոր հեռուստալրագրողուհի Բարբարա Ուոլթերսը, U2 իռլանդական ռոք-խմբի վոկալիստը, ամերիկացի գրող եւ կոմիքսների ստեղծող Սթեն Լին:
Ամենաազդեցիկ հռչակավոր անձանց «տասնյակը» եզրափակում է ռադիոմեկնաբան Ռաշ Լիմբոն: