1 րոպեի ընթերցում
ԳՅՈՒՄՐԻ, 15 ՀՈՒՆՎԱՐԻ, ԱՐՄԵՆՊՐԵՍ: Գյումրու քաղաքապետ Սամվել Բալասանյանն աշխատանքային այցով ԱՄՆ Կալիֆոնիա նահանգում է: Քաղաքապետը Միացյալ Նահանգներ է մեկնել հունվարի սկզբին՝ ԱՄՆ հայ համայնքի հրավերով: Թեև այս պահին Սամվել Բալասանյանն արձակուրդում է, սակայն այցը կարելի է համարել աշխատաքնային: Այս մասին «Արմենպրես»-ին տեղեկացրեց քաղաքապետի մամուլի խոսնակ Զոհրապ Եգանյանը:
Սամվել Բալասանյանն այս ընթացքում արդեն հասցրել է հանդիպումներ ունենալ Գլենդեյլի և Ֆրեզնոյի քաղաքապետերի հետ: «Այցի ընթացքում նախատեսված էին մի շարք պաշտոնական հանդիպումներ ինչպես հայաշատ վայրերի քաղաքապետերի, համայնքապատկան կառույցների, այնպես էլ հայ համայնքի ներկայացուցիչների հետ: Այցի հիմնական նպատակն է ներկայացնել Գյումրու այսօրվա վիճակը, կատարել համագործակցության առաջարկներ, հնարավոր ներդրումների հետ կապված որոշակի քննարկումներ»,- նշեց մամուլի խոսնակը` հավելելով, որ այցի վերջնական արդյունքները կներկայացվեն քաղաքապետի վերադարձից հետո: Քաղաքապետը Գյումրի կվերադառնա մոտակա օրերին:
Գյումրին քույր քաղաք է ԱՄՆ Վիրջինիա նահանգի Ալեքսանդրիա քաղաքի հետ: Միջազգային համագորրծակցություն է ծավալում նաեւ տարբեր երկրների 12 քաղաքների հետ: